EH Bildu: "Udalaren utzikeria istripu larri batean amaitu da"
Larunbatean Trintxerpeko zelaiko hesia hautsi eta lau gazte zauritu izana "jarduera negligente" baten ondorio izan zela salatu dute. Hesia bridekin lotuta zegoen.
Hainbat zale futbol zelaiko hesira igo zirenean estrukturak amore eman zuen. 
Larunbat arratsaldeko 18:30a aldera Trintxerpeko futbol zelaian jazotako istripua udalaren “utzikeriaren” ondorio izan zela salatu du EH Bilduk, amore eman zuen hesia bridekin tinkatuta baitzegoen, eta hura erortzean lau gazte zauritu ziren. Haietako bat ospitalean dago.
Sanpedrotarra taldea Usurbilen aurka lehiatzen ari zela, taldeetako batek gola sartu eta zale batzuk futbol zelaiaren kanpoaldean dagoen hesi batera igo ziren hura ospatzeko asmoz. Hesia bere tokitik atera eta bertan helduta zeuden gazteak zelaira erori ziren, lau zauritu utziz.
EH Bilduk salatu du hesia bridekin lotuta zegoela eta, beraz, bere egoera “ez zela onargarria”. Horrekin, hesiaren zati horrez gain, estruktura osoaren egoera desegokia dela aitortu dute: “Hainbat tokitan hesien arteko loturak apurtuta daude. Egoera txarrean dago bere osotasunean eta arriskutsu”.
Udal espedienteak errepasatu ostean, bilkideek jakinarazi dute apurtzen diren hesietan bridak jartzeko “ohitura handia” dagoela, eta beraz, ez dela udalak metodo hau erabiltzen duen lehen aldia. Horrez gain, mahai gainean jarri dute kudeatzaileek hainbat txosten egin dituztela azken urteotan zelaiak zituen gabeziak aditzera emate aldera, baita hesi perimetralari dagozkion gabeziak ere. “Beraz”, ondorioztatu dute, “argi eta garbi esan genezake kasu honetan udalaren utzikeria istripu larri batean amaitu dela”.
Zelai horretan denbora gutxian gertatzen den hirugarren istripua izan zen joan den larunbatekoa, eta egoera onartezintzat jo du oposizioko alderdiak: “Jarduera negligente baten aurrean gaude, egoeraz jabetu arren ez delako hau konpondu ezta aurreikusi ere konpondu behar denik”.
Nahiz eta aitortu duten zaletuek ez zutela zertan hesira igo, ezinbestekotzat jo dute gogora ekartzea estruktura udal instalazioa dela, eta beraz, herriko gobernua dela horren baldintza egokiak bermatzeko arduradun bakarra. Gertatutakoa argitzeko lanean ari da EH Bildu, “beharrezkoa balitz, ardura politikoak eskatuko ditugu. Egoera hau onartezina da”. Zaurituei keinua egin diete: “Lehenbailehen osatzea espero dugu, bereziki ospitalean jarraitzen duen gaztea”.
