[Bideoa eta galeria] Militarrik gabeko eremu izendatu dute Jaizkibel
Jaizkibelgo eremu militarraren kontrako seigarren martxa egin zuten atzo. Jai giroan egin zen martxa, Ertzaintzaren presentziarekin eta salaketekin bukatu zen.
Atzo (igandea) egin zuten Jaizkibelgo eremu militarraren kontrako seigarren martxa. 100 bat lagun bildu ziren hainbat kolektibok deitutako mobilizaziora. Jai giroan, aldarrikapenekin, joan zen goiza. Azken unean, berriz, jai giro hori zapuztu egin zen, Ertzaintza agertu eta hainbat kideren kontrako salaketa jarri zuelako, ustez abisurik gabeko juntadizoa egiteagatik. Ikusi beharko salaketa horiek zein bide jarraituko duten.
10:00etan atera zen martxa Gurutze Santuaren plazatik. Handik, lehenik, Iparragirreko eremuko barrakoietan egin zuten lehen geldialdia. Barrakoi horietan frankismoak bortxaz eta esklabotzan lanean izan ziren trabajadoreak hartu zituen. Besteak beste, Jaizkibelen hainbat herri lan egin zituzten, behartuta, frankismoko lehen urteetan ehunka lagunek.
Handik kantinara bidea egin zuten martxalariek, han autoz joan zirenekin bat egin, eta eremu militarrera iritsiz. Ekitaldiaren txanda iritsi zen bertan. Eremu militarrak eta ejerzitoek eragiten dituzten kalteen berri eman zieten mobilizazioan parte hartu zutenei, eta aldi berean, umorez, Jaizkibel militarrik gabeko eremu izendatzeaz gain, hurrengo urtean ‘ejerzitoa deuseztuko’ dela ziurtatu zuten hitza hartu zutenek (ustezko telefono dei baten bitartez), “UMEa ere deuseztuko dugu”. Hamaiketakoa ere egin zuten eremu militarraren alboan, eta bereziki gogoan izan zuten Mila, aurreko martxetan otorduaz arduratu zen kidea.
Harri batean zeudenen energia bildu, eta eremu militarraren ondoan lurperatu zuten harri hori, energia horrekin eremua ejerzitoetatik mendia libratuko delakoan, denen energia horren baliagarri izanda.
Behin ekitaldia bukatuta, eta jasotzeko garaia zenean, Ertzaintza agertu zen Jaizkibelera. Martxan parte hartu zuten joaldunak geldiarazi, identifikatu, eta haien kontrako salaketa jarri zuten, polizien arabera notifikatu gabeko mobilizazio batean parte hartzeagatik. Gainera, gertatzen zenaren berri izatera joan ziren beste bi pertsonari ere salaketa ezarri zieten. Horren harira, Jaizkibel Herriarena plataformak poliziaren jazarpena salatu du.
Jarraian, atzoko hainbat argazki eta bideoa.
