Bihar hasiko den Pasaiako Dantza Festibala aurkeztu dute
Hirugarren edizioaren nondik-norakoak aurkezteko agerraldia egin dute gaur goizean jaialdiaren antolatzaileek. Gogotsu daude.
Pasaiako Dantza Festibalaren hirugarren edizioaren aurkezpena egin dute gaur goizean emanaldietako agertoki nagusietako bat izango den Ibaiondo zabalgunean. Bihar eskainiko dituzte jaialdiari hasiera emango dioten lehen emanaldiak. Egitarau osoa ikusgai dago honako lotura honetan.
Izaskun Gomez alkateak hartu du lehen hitza, dantzak eta, orobat, kulturak, Pasaiari bizia ematen diotela nabarmenduz: “Kultura funtsezkoa da gure gizartearen aurrerabiderako”. Hala, harro agertu da PDFren hirugarren edizioa aurrera atera izanagatik. Harekin izan da, udaleko ordezkari moduan, baita Andrea Palomares zinegotzia ere.
Iurre Aranburu eta Aiert Beobide dira festibalaren antolatzaile nagusiak. Bigarrenak prentsaurrekoan adierazi du “sekulako egitaraua” prestatzea lortu dutela, eta gogoz daudela sortzaileak martxan ikusteko.
Dantza herritarrei hurbiltzea da jaialdiaren helburua, eta pauso bat haratago joan dira aurten xede horretan, izan ere, dantza Pasaiako hiru ikastetxeetan txertatzeko proiektua abiarazi dute. Hala, La Anunciata, Pasaia-Lezo Lizeoa eta Karmengo Amako DBHko 122 ikasleren “barnean sartu” dute dantza jaialdia girotzeko.
Goizeko topaketarekin bat egin dute, halaber, programaren parte diren sortzaileetako hiruk: Noemi Viana, Iker Murillo eta Vitali Safronkinek. Ezjakintasuna antolakuntza prozesuan bidelagun izan dutela aitortu dute, azken uneraino ez baitute jakin zer-nolako ikuskizunak eskaini ahal izango zituzten; beldur horrek, hain zuzen, eragin du inoiz baino gogotsuago egotea aurten datozen egunetako emanaldiak eskaini eta beste sortzaileen lanekin gozatzeko.
Studio24ko sortzaile den Murillok erreferentzia egin dio akademiako ikasleek festibalaren baitan eskainiko duten emanaldiari, izan ere, sarrerarik ezingo dute jarri eskuragai, familiakoekin edukiera osoa bete baitute. Haur bakoitzeko ikusle bakarra bertaratu ahal izango da dantzaz gozatzera, baina dantzariak aitortu du erabakiarekiko jarrera hobeezina izan dela: “Gurasoek ulertu dute; gainera, emanaldi gehiago eskainiko ditugu laster”.
Emanaldietarako gonbidapenak leihatilan eskuratu beharko dira aurten. Informazio guztia, hemen.