Norberak zero kilometroko energia sortzeko egitasmoa aurkeztu dute
Bakoitzak kontsumitzen duen energia berriztagarria sortzeko eguzki-parkeak eraikiko ditu autokudeaketa sistemak. Herritarrek kooperatibak eratuko dituzte.
Gaur goizean aurkeztu diete autokudeaketa sistema eskualdeko udaletako ordezkari nahiz Oarsoalde Garapen Agentziako kideei. 
Ekiola elkartearen bidez energia berriztagarria sortzeko herritarren kooperatibak eratzea helburu duen iniziatiba gaur goizean aurkeztu diete, Oiartzunen, Oarsoaldeko ordezkari eta eskualdeko garapen-agentziako kideei. Helburua da herritarrak autokudeaketa-errealitate batean txertatu eta zero kilometroko energia sortuko luketen eguzki-parkeak eraikitzeko egitasmoa martxan jartzea.
Estrategia berritzailearen oinarria da herritarrak ahalduntzea energia berriztagarria sortu eta kontsumitzeko. Kooperatibetan bat eginez, sistema elektrikoan zeresana izango dute parte hartzaileek, eta tokian tokiko administrazioen bultzada izango duten energia komunitateak sortuko dituzte.
Funtzionamendua
Oarsoaldean Ekiolarekin bat egiteak autokudeaketa kooperatiboko errealitate batean integratzea ekarriko luke, herritarren energia-beharrak asetzeko. Formula horrek 1 MW-etik 5 MW-era bitarteko potentzia duen eguzki-parke bat eraikitzeko aukera ekarriko du Oarsoaldera (instalazioaren tamainaren eta sortzen diren atxikipenen arabera), eta 0 kilometroko energia sortuko litzateke bertan.
Kontsumitzaileek kooperatibaren jabetzaren zati bat erosiko dute, etxebizitzaren energia-kontsumoaren araberako kostuarekin; herritar bakoitzak kontsumitzen duen energia produzitzea da helburua. Kooperatiba bakoitzak instalazioak eraiki eta erabiliko ditu, epe luzerako kostu egonkor batekin (25 urte edo gehiago). Emaitzak kooperatibistei itzuliko zaizkie xehatutako faktura elektrikoetan, adierazi dutenez, argi faktura gutxi gorabehera %20-30 murriztuta.
Gauzak horrela, parte hartzaileek urtero ikusiko dute instalazioaren emaitza, alderdi ekonomiko nahiz elektrikoei dagokienez. Ekiolako arduradunek nabarmendu dute kooperatibakide bakoitzak boto bakarra izango duela, bere kontsumoa edozein izanda ere.
