[Galeria] Harrera egin diote Pasaian herri kurduari
Espainia eta Portugalen mugimendu kurduaren ordezkari den Faruk Doruri ongietorria egin diote gaur goizean. Bixi-Bixiren 'Gora herriak' jardunaldiekin bat egitera dator.
Pasaiako alkate Izaskun Gomez eta Kurdistango ordezkari Faruk Doru, gaur goizean, udaletxean. 
Gaur goizean harrera egin diote Pasaiako Udalean Espainia eta Portugalen mugimendu kurduaren ordezkari den Faruk Doruri. Gonbidatuak Bixi-Bixi elkartearen ekimenez hartu du lur Pasaian, Donibaneko taldeak antolatutako Gora herriak iniziatibaren baitako jardunaldiekin bat egiteko asmoz.
Doruk herri kurdua pairatzen ari den zapalkuntza geopolitikoaren berri emango du gaur arratsaldeko solasaldian; 19:00etan Juanba Berasategin izango da Federalismo demokratikoa. Kurdistanen alternatiba politikoa izenpeko hitzaldian, Suargi GKE-ko kide Alaitz Berrozabalgoitiarekin batera.
Ordezkari politikoak aurreratu du egoera larria dela, Kurdistan lau estatuk banatuta eta erreprimituta baitago (Irak, Iran, Siria eta Turkia). Horren aurrean, herriak duen alternatiba bakarra konfederalismo demokratikoa dela azaldu du, soilik horrekin lortu ahal izango baita “lurraldea osatzen duten herrien arteko bizikidetza”. Borrokaren ardatzetako bat emakumeen askapena dela aipatu du Doruk.
