Ikasleen eskaerak aintzat hartuko ditu Lezoko Udalak
Lezo Institutuko ikasleek ikasturte honetan Agenda 2030en barruan landutakoaren berri eman diete Lezoko Udaleko ordezkariei.
Lezo Institutuko ikasle eta irakasleak, Joxean Sanchez Ingurumen zinegotziarekin. Agenda 2030aren barruan, Lezo Institutuko ikasleak basoen gaineko lanketa egiten izan dira ikasturtean. Egindakoaren berri emateko txanda izan da gaurkoa, udal ordezkarien aurrean azaldu dituzte landutakoak, eta hainbat eskaera plazaratu dituzte, hobekuntzak egite aldera. Lezoko Udalak haiek esandakoak aintzat hartuko dituztela esan du.
Joxean Sanchez Ingurumen zinegotziak, batetik, zoriondu egin ditu herriko ikasleak egindako lanagatik. Bestetik, jakinarazi du haien eskaeretako bitan lanean diharduela udalak, hala nola Altamirako parkea birmoldatzen, eta Jaizkibel mendiko hainbat zuhaizti biziberritzen. Ikasleen beste eskaera bat: Altamiran, aire librean, eskolak jasotzea.
Hurrengo ikasturterako Agenda 2030eko gaia larreen eta zelaien azterketarena izango da.
