Astelehenean iritsiko da uda Altzatera
Astelehenean (hilak 14) zabalduko dute Lezoko Altzate igerilekuko udako sasoia, kanpoaldea irekitzearekin. Igeriketa ikastaro trinkoak dituzte eskaintzan.
Astelehenean zabalduko dituzte Lezoko Altzate igerilekuaren kanpoaldeko instalazio eta berdegunea. Udako aroa hasiko da herriko igerilekuan. Jada azken prestaketak egiten ari dira bertako langileak dena egoki egin dadin hala nahi dutenei harrera egiteko. Nabarmentzekoa da, iaz estreinatu ezin izan ziren urezko jolas guneak erabiltzeko aukera izango dela aurten.
Horrekin lotuta, BPXport Lezok jakinarazi du (Lezoko kirolguneak kudeatzen dituzte) udako igeriketa ikastaro trinkoak antolatu dituztela. 4-15 adin tarteko haur-gazteentzat daude bideratuta, eta hiru dira: lehena hilaren 21etik uztailaren 2ra; bigarrena uztailaren 5tik 16ra; eta hirugarrena uztailaren 19tik 30era. Arratsaldez dira ikastaro horiek, 16:00etatik 18:15era. Horietan izena emateko deitu Altzatera (943 51 03 11) edo pasa bertatik. Informazioa jasotzeko aukera dago ere bide horietatik.
Bestalde, Lezoko kirolguneetan udako eskaintza berezia dute abian. Bihar (ostirala) arte instalazioetan udako abonua egiten dutenek, ez dute matrikula ordaindu beharko.
