Zirika: "Gazteria beldurtzeko edozer egiteko prest daude, baina ez dute lortuko"
Logoa hainbat paretetan margotzeagatik isunak jaso dituzte Zirika Neska Gazte Taldeko hainbat kidek.
Zirika Neska Gazte Taldearen agerraldia. Herriko hainbat paretetan Zirika Neska Gazte taldearen logoa margotzeagatik hainbat taldekide identifikatu eta horietako bat, adin txikikoa, bi orduz ertzain etxean erretenitu zituzten duela urte erdi. Azaroaren 25ean izan zen, indarkeria matxistaren aurkako egunaren testuinguruaren barruan. Orain, sei hilabete geroago, isunak jaso dituzte neska gazte horiek. Gaur agerraldia egin dute, Zirika osatzen dutenek, Ernaiko hainbat kidek, eta mugimendu feministak babestuta Zumardian. Haserre azaldu dira, eta determinazio zehatz batekin, borroka feministan urratsak egiten jarraitzeko prest, lanerako prest.
Beren jarduna aurrera eramateagatik jasotako isunak ordaindu ahal izateko, poltsak jarriko dituzte salgai. ez dute gaurkoan zehaztu non eta noiz izango diren salgai, baina laster izango dela esan dute.
Gazte mugimendua poliziaren eskutik jasaten ari den bortizkeria eta jazarpena eguneroko kontua bilakatzen ari dela salatu dute gaurko agerraldian, “hainbat izan dira euskal gazteriaren aurka egindako erasoak azken hilabeteetan, eta Oreretako Zirika Neska Gazte taldeari ere tokatu zaigu”. Logoak margotzea, kalean euren presentzia areagotzeko modua izan zela azaldu dute, “gure helburua, zentzurik gabeko pintadez beterik dagoen herri batean gure lekua edukitzea zen, gure aldarriak kaleratzearekin bat. Gehiegikeriaz identifikatu, ertzain etxean erretenitu, eta mehatxuak ere jaso genituen”.
Pairatu behar izan zuten egoeraren salaketa izan da gaurko agerraldia, “ez da normala neska gazte talde txiki baten aurka horrelako despliege poliziala erabiltzea, ez zen beharrezkoa. Haien estrategia argia da, beste behin ere ikusi dugu gazteria beldurtzeko edozer egiteko prest daudela”. Argi dute eurena ez dela kasu isolatu bat izan, logika jakin baten barruan kokatzen diren erasoak baizik, eta horrek adierazten omen du antolatutako gazteriarekiko duten beldurra, “ez dute ordea, lortuko. Haien jazarpenak ez gaitu isilduko, errepresioaren gainetik antolatzen eta borrokatzen jarraituko dugu. Herri oso bat dugu gurekin”.
