Azken asteburuan giroa lasaiagoa izan da herrigunean
Gaiarekin lanean ari den Bizilagun taldeak, zarataren eta zikintasunaren problematika konpontzen joan daitezen, herritarren ekarpenak biltzen hasteko asmoa iragarri du.
Azken asteburuan hobera egin du giroak Lezoko herrigunean. Hala jakinarazi du azken aldian kale zurruta, zarata, zikinkeria eta izan diren hainbat txikizioekin kezkatuta lanean ari den Lezoko bizilagunen taldeak. Giroa askoz ere lasaiagoa izan omen dela azaldu dute komunikabideetara bidalitako prentsa oharrean, eta ez dutela aparteko kexarik jaso, zarata, zikintasuna, liskar edota txikizioekin lotuta. Poliziaren esku hartzerik ere ez da izan.
Orain arte bi bilera egin dituzte gaiaren gainean; lehena, EH Bilduk deitu zuen mahairen gainean jartzeko arazoa. Bigarrena, bizilagun talde batek deitu zuen, eta herritar ugarik egin zuten bat, kezka izan badela argi utziz. Bi bilera horietan argi utzi zuten bertaratutakoek ulertzen dutela ongi pasatzeko nahia eta beharra, eta biltzearena oinarrizko eskubidea dela badakitela, “guztiok errespetua eta elkartasuna izanda, denok irabazten dugu”.
Bizilagun talde horrek, gainera, zarataren eta zikintasunaren problematika konpontzen joan daitezen, herritarren ekarpenak biltzen hasteko asmoa iragarri du.