640 kilo hondakin arrantzatu dituzte
Hondakinak bildu eta bereizteko ardura ez hartzeak ondorio latzak ditu ingurunearentzat, bai eta landareri zein animalientzat ere.
Erreka bazterretan pilatutako hondakinak ere bildu dituzte. Plastikoak adarretan. Argazkia: Herri bizia Hondakinak bildu eta bereizteko ardura ez hartzeak ondorio latzak ditu ingurunearentzat, bai eta landareri zein animalientzat ere. Herritar orori dagokio bilketa arduratsu horretan parte aktibo izan eta hondakinak bereiztea errespetuz jokatzeko. Bide horretan urratsak egin badira ere, oraindik ere erabateko konpromisora heltzeko bidea luzea dela erakusten du Errenteriako Udalak eta Behemendi Landa Garapenerako elkarteak elkarrekin egin duten Errenteria-Oreretako ibaien garbiketa kanpainan.
Sei egunez, brigada bat aritu da ibai, ibilgu eta erretenetan zein horien bazterretan pilatutako hondakinak biltzen, inguru horiei eta bertan bizi den fauna eta florari arnasa emateko. Apirila eta maiatza artean egindako garbiketa horretan, 640 kilo hondakin jaso dituzte; askotarikoak ziren tartean, baina bat nagusi: plastikoa.
Oiartzun ibaiaren ibilgua, Tolarieta, Masti, Lintzirin eta Epentza erretenetan egin dute garbiketa.
Sentsibilizazioa du helburu kanpainak. Herritarren kontzientzia piztu eta gogoraraztea hondakinak jatorrian murrizten eta birziklatzeko egoki bereizten ez badira, inguruko erreka eta ibaietan azalduko direla, horiek kaltetuz eta kutsatuz, “bukaeran hondakin horiek Kantauri itsasoraino iritsiko dira”. Halaber, hondakin horiek desegiten diren neurrian, ekosistemarako eta fauna eta flora basatiarentzat kaltegarriak diren konposatu kimikoak askatzen dituztela azaldu dute kanpainaren bultzatzaileek, “kutsadura fokuak sortuz ibilgu eta hondoetan”. Plastikoaren kasuan, heriotza zigorra bihur daiteke hegazti eta arrainentzat hartan korapilatu edota irensten badute.
