'Aniztasuna gara' leloarekin hasiko du denboraldia Hibaikak
Arraun elkartearentzat ezinbestekoa de bazkide eta babesleen babesa aurrera egiteko. Herritarrei deia egin die bazkidetu daitezen, eta saltoki, enpresa eta bestelakoei gogorarazi ateak zabalik dituztela iragarleentzat.
Hibaikako emakumeen trainerua kontxarako sailkatu zenean iaz. Asteburuan hasiko dute lehiaketa ofiziala Hibaikaren bi traineruek. Egun bereziak dira Ondartxoko arraun instalazioan, bi senior ontziak denboraldirako gogor prestatzen ari direlako, eta bestalde, abonatuak erakartzeko kanpaina abiatu duelako klubak. Horren harira, herritar oro animatu dute aletxoa jartzera, “herritik eta herriarentzat” abiatutako proiektua babesteko. Kuota 30 eurokoa da urtean, eta izena emateko txartela Foru Plazako Rosmi dendan eskuratu daiteke, edo Hibaikako zuzendaritzako kideen bidez. Abonatuek klubaren gaineko informazio guztia jasotzen dute unean unean, eta klubaren materiala eskuratzeko garaian beherapenak dituzte.
Bazkide bila bai, baina herriko saltokiei ere luzatu die kluba deiak, iragarle izan nahi dutenei ateak zabalik dituztela azalduta.
Arraunlari berrien erantzunarekin ere pozik da kluba. Izan ere, kategoria gazteenetan nabarmen igo direla fitxak esan du.
Ortzadar bandera brankan
Hibaikaren bi traineruek ortzadar bandera eramango dute brankan margotuta. Francis, Vicente Vadillo Santamariaren hilketaren 42. urteurrenaren testuinguruan abiatu dute iniziatiba hori, “arraun munduan maiz ikusten ez den keinua egin nahi izan diogu LGTBIQ+ kolektiboari, jendartean bezala gure klubean ere dagoen aniztasuna islatuz. Zorionez bakoitza ezberdina gara eta elkar aberasten dugu”.
Larunbat arratsaldean ekingo diote arraunlariek lehiaketari Pasaiako urtean. Iñaki Mendizabalek gidatzen duen emakumeen tripulazioa gogor hasiko da, asteburuan saio bikoitza izango duelako: Pasaian larunbatean eta Getarian igandean. Imanol CAscanteren mutilek, berriz, larunbateko jardunaldiarekin egun bakarrean beteko dituzte asteburuko etxeko lanak.
Hibaikak, distantziatik bada ere, bi tripulazioak babestu eta animatzeko eskatu die herritarrei.
