52 alokairuzko etxebizitza eta anbulatorio berria, Jaizkibel eta Aralar kaleen arteko eremuan
Irailean hasiko dira lehen zundaketa lanak egiten, eta bi urtean egina egongo da proiektua. Alokairua, pertsonen errentaren araberakoa izango da.
Lezoko Udalak iragarri duenez, alokairu sozialeko 52 etxebizitza eta anbulatorio berria egingo dituzte Aralar kalearen eta Jaizkibel hiribidearen artean dagoen lur eremuan, zehazki, 1. sektoreko D izeneko eremuan. Bi urteko epean eginak izango dira, eta Eusko Jaurlaritzak egingo ditu udalaren onespenarekin, obra lizentzia eman baitio. Lehen indusketa lanak irailean dira hastekoak. 4,7 milioiko inbertsioa egingo du Jaurlaritzak bertan. Lehen aldia da Lezon gisa honetako alokairuzko etxebizitza sozialak egiten dituztela.
Udalak argitu du etxebizitza horiek egitearen helburua dela etxebizitza libre bat eskuratu ezin dutenei etxebizitzarako eskubidea erraztea, alokairuaren formularekin. Gehienez bost urterako alokatuko dira.
Alokairuzko etxebizitza horietako bat lortzen dutenek (aurrerago emango dituzte horietan izena emateko epeak eta baldintzak) hilero kanon bat ordaindu beharko dute, betiere eskatzaileen errentaren eta esleituko zaien etxebizitzaren araberakoak. Hala, alokairuzko etxebizitzek sukalde osoa eta bainugela muntatuak izango dituztela jakinarazi dute: logela bakarreko etxebizitzak 44 izango dira (mugikortasun arazoak dituztenentzat bi izango dira), eta zortzi bi logelakoak. A kalifikazio energetikoa izango dute.
Etxebizitzen erakin horren behealdean anbulatorio berria egingo dute, 786 metro koadrokoa.
Jesus Mari Martiarena alkateak adierazi du “oso albiste ona” dela etxebizitzen eraikitzearena, “behar handiena duten pertsonentzako etxebizitzak sortuko direlako, baita Lezoko anbulatorio berriak izango duen kokapen berriagatik ere. Berritu egin behar zen, lezoarrei zerbitzu onena eskaini ahal izateko”.
Egitasmoa udaletxean dago eskuragarri, edonork ikusteko aukera dago.
