Gazteentzako espazio estaliak eraikiko dituzte San Pedro eta Trintxerpen
Aldundiaren diru laguntza bati esker, 500.000 euro baino gehiago inbertituko ditu udalak lau jarduketetan; artean, aisialdirako estalpeko eremuen sorrera.
Rafaela Romero eta Izaskun Gomez, gaur goizean, hitzarmenaren aurkezpenean. 
Mugikortasuneko eta Lurralde Antolaketako diputatu Rafaela Romerok eta Pasaiako alkate Izaskun Gomezek gaur goizean aurkeztu dute badia biziberritzeko sinatutako hitzarmena. Akordioaren helburua udalerriaren hiri berrikuntza bultzatzea eta ingurune “jasangarriago, irisgarriago eta inklusiboago” baterantz aurrera egitea dela adierazi dute.
Sinatutako hitzarmenean Foru Aldundiak ia 490.000 euroko ekarpena egingo du, eta Pasaiako Udalak, berriz, 86.470 euro baino gehiago inbertituko ditu. Gauzak horrela, guztira 576.470 euroko zuzkidura izango dute honako jarduketa hauek:
- 125.800 euro, oinezkoen eta ibilgailuen arteko bizikidetza hobetzeko Antxon eta Trintxerpen.
- 183.600 euro San Pedro eta Trintxerpen adingabeentzako espazio estaliak sortzeko eta aisialdirako eremuak hobetzeko.
- 138.100 euro ariketa fisikoa eta sozializazioa sustatzeko ekipamendurako, badiaren inguruan.
- 42.500 euro Antxo, Donibane eta Trintxerpen irisgarritasuna hobetzeko.
Gomezek bereziki nabarmendu du San Pedron eta Trintxerpen adingabekoentzako espazio estaliak eta aisialdirako guneak sortzeko proiektua: “Oso jarduera zehatza da, eta espazioak egokitzea aurreikusten du, gazteak ingurune seguru batean erlazionatu ahal izan daitezen, egungo gizarteak eskatzen dituen beharretara egokituta”.
