Gizon bat espetxeratu dute arma zuriarekin hilketa saiakera egitea egotzita
32 urteko gizonezkoa maiatzean Antxon izandako talde eraso batengatik atxilotu dute. 17-36 urte bitarteko beste 11 erasotzaile ere identifikatu dituzte.
Ertzaintzak agintari judizialaren eskuetan utzi du homizidio ahaleginaren ustezko delitu batengatik atxilotu duen 32 urteko gizona. Pasai Antxon taldeko eraso batean gazte bat arma zuri batekin zauritzea leporatuta, Martutenen espetxeratu dute.
Identifikatu dituzten gainerako ustezko erasotzaileei (beste 11 lagun) polizia-eginbideak ireki dizkiete eta ikerketapean geratu dira. Erasotzaileak 17 urtetik 36 urtera bitartekoak dira, eta inplikazio maila ezberdina dutela adierazi du Ertzaintzak.
Erasoa Blas de Lezo kalearen bukaeran gertatu zen.
Aurrekariak
Ikertu dituzten gertaerak joan den maiatzaren 15ean, gauerdi inguruan, jazo ziren Antxon. Jakinarazi dutenez, bi gizonezko biktimari lapurtzen saiatu zirenean hasi zen gatazka; “gero pertsona gehiago batu zitzaizkien”, azaldu dute agenteek, “eta orduan hasi ziren gaztearen aurkako kolpeak eta erasoak”.
Ikerketaren arabera, bi inplikatuk, dirudienez, arma zuri bana erabili zuten, eta hiltzeko mehatxuak egin zizkioten biktimari. Erasotutako gizonari ebakia egin zioten masailezurrean, beste zauri bat bizkarrean eta hainbat mozketa jaso zituen eskuetan, bere burua babesten saiatu izanagatik. Horiez gain, gorputz osoan kolpeak jo zizkiotela jakinarazi dute agenteek.
Ikerketaren ondoren, joan den astean atxilotu zuten Astigarragan erasoan arma zuria ustez erabili zuen erasotzaileetako bat. Gizonezkoak dokumentazio faltsua zeraman beste pertsona baten izenarekin, eta polizia-aurrekariak ditu indarkeria erabiliz lapurreta egin izanagatik. Horrez gainera, espetxean sartzeko Nafarroako epaitegi baten agindu bat du indarrean.
