Elkarbizitzaren aldeko urratsa egingo dute Lezoko gazteek
Larunbateko sutea asteburuetan izaten diren gazteei leporatzea ez dela zilegi uste dute. Salto-saltoko langileari laguntza emateko kanpaina egingo dute.
«Azkenaldian Lezon izan diren hainbat gertakarik larrituta», herriko zenbait gaztek aurrera urratsa egitea erabaki dute. Larunbatean Euskal Herria plazako salto-saltoaren suteak asaldatu ditu, eta biltzen hasi dira. Nabarmendu dute sutearen jatorria oraindik ezjakina dela, eta gertakari hori kalean asteburuetan izaten diren gazteen gain jartzea ez dela zilegi, «ez du balio gauez gertatu delako guztia gazteoi leporatzea».
Adierazi dute ez dituztela babesten asteburuetan herrian izan diren txikizio edo, larunbateko kasuan bezala, langile bati egindako kalteak. «Herri txikia da Lezo, eta konbentzituta gaude arazoei irtenbidea topatzeko modu bakarra gazteon arteko eta herritarren arteko sareak indartzea dela», esan dute. Asteburu gauetan kalera atera direla bai onartu dute, eta beharbada egin duten zaratak eta sortu duten zikintasunak lezoarrak gogaitu dituztela. Baina bizikidetza errazteko urratsak egiteko prest daude, «guk geuk ere arduraz jokatu nahi dugu».
Suteagatik kalteak jasan zituen salto-saltoaren arduradunei babesa adierazteko eta «elkarbizitzarako urratsa» egiteko kanpaina abiatu dute gazteek. Horren berri, bihar (osteguna) Karlos Saldise plazan egingo duten bilkuran emango dute. 20:30erako hitzartu dute batzarra. Argazki erraldoia egiteko asmoa dute.
