Allerruk zazpigarren taldea nahi du, nesken Haur Mailakoa
Azken sasoian izan dituen sei taldeei beste bat erantsi nahi dio futbol taldeak. Horretan izena emateko epea zabalik dago dagoeneko.
Allerru Kirol Elkarteak nesken talde berria nahi du 2021-2022 sasoirako: Haur Mailako taldea. Hori osatzeko, 2008an eta 2009an jaiotako neskei eta haien familiei deia egin diete, Allerruk taldea atera nahi duelako, eta hori egin ahal izateko gutxienez 10 jokalari behar dituztelako (maila horretako partidetan, taldeak sei jokalarik eta atezainak osatzen dituzte).
Allerrun izena eman nahi dutenek bi bide dituzte. Batetik, Plazetatik pasa daitezke hala nahi dutenek apuntatzera. Bestela, 650 27 45 93 telefono zenbakira deituz gero edo Whatsapp mezua idatzita izena eman edo informazio gehiago lor daiteke.
2020-2021 sasoian sei talde izan ditu Allerruk: Gizonen Erregional Ohorezko Mailakoa; Emakumeen Gorengo Mailakoa; gizonen Lehen Erregionalekoa; gizonen Gazteen Lehen Mailakoa; eta kadeteetan neskena zein mutilena. Zazpigarrena litzateke nesken Haur Mailakoa.
