Ombuaren Itzala bertso festa giro paregabean ospatu dute
60 bat lagun bertaratu ziren Pedro Mari Otaño bertsolariaren bizitza bildu duen Ombuaren Itzala filmaren berri izateko.
Ombuaren Itzala bertso festaren irudi bat. Argazkia: Joana Barriola Ombuaren itzala. Hori da Pello Mari Otaño Barriola bertsolari zizurkildar handiaren bizitza jaso nahi duen filma. Aitortza egin nahi diote Oatñori, bere ibilbidea jaso eta auzolanetik ari dira egi bihurtzen proiektua. Bertsolari handi, poeta, opera libreto egilea izan zen Otaño, eta proiektuaren atzean daudenen esanetan, liberala, errepublikazalea, zazpiak baten defendatzailea, euskara muinean zuena.
Ombua, Argentinako zuhaitz eder mitikoa da. Hirutan izan zen Argentinan Otaño, gerrari intsumisoa eginda, Euskal Herriko egoerarekiko errebelde, eta migratzaile. Argentinan hil zen zizurkildarra.
Patxi Bisquert da filmaren arduraduna, Juanba Berasategi handia zenarekin ondu omen zuen filmaren ideia; Eguzki Art zinema ekoizpen etxearen egitasmoa da. Gidoiaren ardura, berriz, Koldo Izagirre idazlearena da, eta musikarena, Joseba Tapia trikitilariarena. Xabier Amuriza da babesle kontseilaria.
Proiektua egi bihurtzeko auzolanean ari dira. Filma ikusi ahal izateko sarrera behar da, 10 eurokoa, eta sarrera erosten duena, gainera, filmaren produktore finantzario izango da. Filma ikusteko, eta filma egi bihurtzeko sarrera horiek salgai daude Errenteria-Oreretan: Mirentxu Liburu dendan, eta Arkaitza eta Sindikato tabernetan.
San Joan bezperarekin egin zuten atzo Ombuaren Itzala bertso festa Errenteria-Oreretan. 60 bat lagun bertaratu ziren Pedro Mari Otaño bertsolariaren bizitza bildu duen Ombuaren Itzala filmaren berri izateko. Otañoren bertsoak bibolinaren laguntzaz abestu zituzten, eta Patxi Bisquertek lehen eskutik azaldu zuen proiektua. Amets Arzallus eta Unai Agirre bertso librean aritu ziren ekitaldian. Proiektua aurrera ateratzeko, kanpaina abiatu dute, eta atzoko ekitaldia kanpaina eta proiektuaren berri emateko baliatu zituzten sustatzaileek.
