Gazteen erantzunarekin, pozik
Gazteen ekinbidearen gaineko balorazioa egin du gaur bertan asteburu gauetan gertatzen ari zirenen inguruan kezkatuta lanean hasi zen herritar taldeak.
Bizilagunen batzarretako baten irudia. Ikertzen ari dira oraindik ere Euskal Herria Plazako haurrentzako atrakzioa kiskali zuen sutearen jatorria. Aurretik nahaspilatuta zegoen giroa, kale zurruta eta horren bueltan asteburu gauetan sortutako zarata, zikinkeria, liskarrak eta txikizioen harira ondoeza agertu zuten hainbat bizilagunek eta giroa lasaiagoa izaten hasi zenean heldu zen atrakzioan izandako sutea.
Lezoko gazte talde batek salto saltoarekin gertatutako gogor salatu eta langileari elkartasuna adierazteko kanpaina abiatu dute. Euro bateko bonuak jarri dituzte salgai herriko tabernetan, eta jasotako diru guztia atrakzioko langilearentzat izango da. Gainera, argazki jendetsua egin zuten, halaber, elkartasuna adierazteko. Hausnarketa ere egin dute, eta herri txikia izanik, irtenbidea belaunaldi ezberdinetako herritarren arteko sareak sortzea den zalantzarik ez dute.
Gazteen ekinbidearen gaineko balorazioa egin du gaur bertan asteburu gauetan gertatzen ari zirenen inguruan kezkatuta lanean hasi zen herritar taldeak. “Poztekoa”, hala definitu du gazteen urratsa: “Poztekoa da herriko gazte batzuk elkartu, adierazpen bat plazaratu, eta argazki jendetsua atera izana”. Ados daude gazteek zabaldu duten mezuarekin, bat datoz.
Azken asteetan errepikatu duen ideiari tarte eman dio herritar taldeak, hau da, “guztiok daukagu biltzeko eskubidea, eta ulertzen dugu, halaber, ongi pasatzeko nahia eta beharra izatea. Baina asteburu batzuetan, zarata, zikinkeria, liskarrak eta txikizioa izan dira Lezoko herrigunean”. Horren harira, hasieratik egindako eskaera bera errepikatu dute: “Errespetua eta elkartasuna. Elkar zaindu behar dugu, eta irtenbidea ez da polizia bidaltzea. Denontzat egoera hobetzeko zerbait egin daitekeela iruditzen zaigu, xumea bada ere; guztion proposamenak ongietorriak izan daitezela, beraz”.
Argi dute bidea: “Guztion artean arituz arazoei erantzun hobea emango diegu”.
