Pasaia Kayakeko haurrek asko dute Espainiako Kopan emateko
Banakako nahiz binakako modalitatean lehiatuko dira 13 eta 14 urteko gazteak. Guztira bederatzi piraguistek osatuko dute klub pasaitarraren ordezkaritza.
Talde-argazkia Legution, infantil mailako Euskadiko Txapelketan, Enara Nuñezk eta Gaizka Lopezek lortutako dominak lepoan eta Noa Revueltak taldekako sailkapenean lortutako bigarren sailkatuaren kopa eskutan dituztela. 
Portomarinen (Lugo, Galizia) izango dira Pasaia Kayak taldeko haurrak Espainiako Kopan lehiatzen bihar (larunbata). 13 eta 14 urteko gazteen ordezkaritza zabala aurkeztuko du klub pasaitarrak.
Kopa 3.000 metroko distantzian jokatuko dute proba guztietan, bai bakarkako K-1 modalitatean, bai binakako K-2 modalitatean ere. Urteko hirugarren proba izango dute larunbatekoa, eta gorantzako bideari eutsi nahi diote Euskadiko Txapelketan lortutako emaitza txukunen ondoren, eta azken aldian normaltasunez entrenatu ahal izan dutela kontuan hartuta.
Goizean, banaka
2007 eta 2008an jaiotako bakarkako piraguistak bi kategoriatan banatuko dituzte, Haurren A eta B taldeetan, hurrenez hurren. Partaidetza oso handia izango da, 100 lehiakide inguru egonik maila bakoitzean. Pasaia Kayakek sei neska eramango ditu A kategoriako banakako probara, bi anai gazte kategoria bereko mutilenera, eta azken lehiakide bat B mailako mutilen kategoriara (bederatzi denera).
Gaizka Lopez (B kategorian) eta Enara Nuñez (A kategorian) dira talde pasaitarrak aurrean ibiltzeko dituen aukera garbienak, aitortu dutenez.
Arratsaldean, binaka
Goizeko saioaren ondoren, arratsaldean jokatu dira K-2 edo binakako piraguen probak, eta hor ere gogotik saiatuko dira pasaitarrak horretarako osatu dituzten talde indartsuenekin. Nesketan, Enara Nuñezek eta Noa Revueltak osatuko dute K-2 bat, eta Kattalin Altunak eta Irati Hercek beste K-2a. Mutiletan, Gaizka Lopezek eta Iñaki Conejerok osatuko dute ontzia.
Taldeko arduradunak bereziki itxaropentsu daude neskek egin dezaketen lanarekin, baina kategoria honetan ere lehia oso handia izango da, talde bakoitzak bikote ahaltsuenak aurkeztuko dituelako. Mutilen kasuan zailagoa izango da, baina txukun aritzea dute helburu, ezer baztertuta gabe.
