Ordezkaritza txukuna aurkeztu dute pasaitarrek Espainiako Kopan
Pasaia Kayakeko haurrek aurpegia eman dute Espainiako Kopan. Erronka zaila izan dute: "lurralde guztietako palistarik onenek parte hartu zuten".
Pasaia Kayakeko kideak, taldeko karpan, noiz lehiatuko zain. 
Emaitza txukunak lortu zituen Pasaia Kayakek larunbatean Portamarineko urtegian (Lugo, Espainia) jokatutako Espainiako Kopan, haurren kategoriako iraupen luzeko estatuko udako probarik garrantzitsuenean.
Erronka oso zaila zela aitortu dute klubeko arduradunek, “estatuan dagoen maila eta lurralde guztietako palistarik onenek parte hartu zutela kontuan izanda”, baina txukun aritu zen taldea, goizeko zein arratsaldeko saioan.
Goizean, banaka
Bakarkako lanean aritu ziren goizean, eta, aurreikusita zegoen bezala, Enara Nuñez eta Gaizka Lopez ibili ziren aurreko postuetatik hurbilen. Nuñezek 25. postua lortu zuen, eta hirugarren euskal ordezkaria izan zen sailkapenean, Eneritz Aizpiolea irundarraren eta Danae Sanmartin nafarraren atzetik.
Lopez, aldiz, 28.ena izan zen sailkapenean, baina postua egin zuen lanaren adierazgarri ez dela aitortu dute arduradunek: “1.000 metroetan sartu zenean lehenengo 15en artean zihoan, top-10ean sartzeko aukerekin, baina pala baten kolpe latza jaso zuen besoan, eta ezinean eta minduta amaitu behar izan zuen proba, postu asko galduz”.
Arratsaldean, binaka
Arratsaldeko binakako saioan lortu zituzten pasaitarrek emaitzarik onenak. Nesken proban, Kattalin Altuna eta Irati Herce pasaitarrek osatutako ontziak 11. postua lortu zuen sailkapenean, top-10ean sartzeko zorian. Enara Nuñezek eta Noa Revueltak osatutako ontzia zen aldez aurretik pasaitarren aukera garbiena, baina beren taldekideen atzetik amaitu zuten, 12. postu duinean.
Eta duina baino gehiago mutilen proban Iñaki Conejero eta Gaizka Lopezek osatutako ontziak lortutako 19. postua, top-20aren barruan, ia 80 ontzik hartu baitzuten parte, eta bigarren euskal ordezkariak izan ziren sailkapenean.
Orain, uztaileko probak prestatuko dituzte haur eta kadeteek, iraupen luzekoak zein olinpiar erako abiadurakoak, Bidasoko Jaitsierarekin hasita.
