San Pedroko babes ofizialeko etxeetan izena eman ahalko da bihartik
Hamar eguneko epea izango dute interesdunek izena emateko. Zozketan pasaitarrek bakarrik parte hartu ahal izango dute, 35 urtetik beherakoak lehenetsiz.
Velasco inguruko lurretan babes ofizialeko 39 etxebizitza eraikiko dituzte. 
Gaur, astelehena, argitaratu da Gipuzkoako Aldizkari Ofizialean San Pedron eraikiko diren babes ofizialeko etxebizitzetako (BOE) zozketan parte hartzeko oinarriak zehazten dituen dokumentua. Hori hala izanik, bihartik aurrera (asteartea) hamar egunez (uztailaren 12ra arte) eman ahal izango dute izena interesdunek zozketarako.
Hilaren 14ean onartu zituen udalbatzak Velasco eremuan eraikiko diren BOE-etarako zozketan parte hartzeko oinarriak. Bilkura hartan, etxebizitzen zozketan pasaitarrek bakarrik parte hartuko zutela erabaki zen, eta horien artean, 35 urtetik beherako gazteei lehentasuna ematea ere adostu zuten udal arduradunek.
Nahikari Otermin hirigintza zinegotziak jakinarazi duenez, udalak egiten diren eskaera guztiak aztertu eta eskatzaileek baldintzak betetzen dituztela egiaztatu ondoren, zozketa egingo du oraindik zehazteke dagoen datan. Edonola ere, “prentsa eta bere web orriaren bitartez jakinaraziko zaie herritarrei noiz izango den Donibaneko Kulturgunean egingo den zozketa”.
Izen eman nahi duen orok HAZeko edozein bulegoren bitartez edota telematikoki egin ahal izango du. Zinegotzi jeltzalearen hitzetan, “aukera paregabea da pasaitarrek euren herrian bertan geratu ahal izateko, bai baitakigu geroz eta zailagoa dela etxebizitza bat erostea, batez ere gazteentzako”.
