Leongo espetxera hurbilduko dute Goierri
Espainiako Barne Ministerioak jakinarazi duenaren arabera, zazpi euskal preso espetxez lekualdatu eta hurbilduko dituzte. Erabakiaren ondorioz, ez da euskal presorik izango lekualdaketak egiten direnean Andaluziako espetxeetan.
Jesus Mari Etxeberria Goierri, euskal presoa. Espainiako Barne Ministerioak jakinarazi duenaren arabera, zazpi euskal preso espetxez lekualdatu eta hurbilduko dituzte. Erabakiaren ondorioz, ez da euskal presorik izango lekualdaketak egiten direnean Andaluziako espetxeetan. Zazpi euskal preso horietako bat da Jesus Mari Etxeberria Garaikoetxea Goierri. Puerto III (Cadiz, Andaluzia, Espainia) espetxeratuta dago oreretarra, 1.025 kilometrora, eta Leongo espetxera —Euskal Herritik 284 kilometrora—lekualdatuko dute.
2002ko abenduaren 22an atxilotu eta espetxeratu zuten, bigarrenez Goierri, eta 30 urteko espetxe zigorra ezarri zioten oreretarrari.
Une honetan beste bost euskal preso oreretar daude. Horietako bat etxean dago preso, Aitzol Gogorza, espetxealdi arinduan. Beste bat Euskal Herriko espetxe batean, Martutenen zehazki, Mikel Arrieta. Gogorzak eta Arrietak gaixotasun larri eta sendaezinak dituzte. Beste laurak, Espainia eta Frantziako estatuetako espetxeetan daude sakabanatuta.
Eider Perez, motxiladun umearen ama, Zaragozako Zuera espetxean aurkitzen da, etxetik 253 kilometrora. Bikotekidea ere espetxean da. Jose Manuel Inziarte, Buto, Kantabriako El Dueso espetxean da, etxetik 174 kilometrora; eta Xabier Goienetxea Goiene, Mont de Marsanen, etxetik 145 kilometrora.
