Antxoko pala txapelketa mistoan izena emateko azken eguna da
Gaurko egunean zehar hartuko ditu azken bikoteen izenak Topaguneak. Ostegunean izango da lehia, 16:00etatik aurrera Biteri plazan.
Aurten San Ferminik ospatu ezingo denez, nolabait herria girotzeko egitaraua prestatu du Antxoko Topaguneak, eta horri hasiera emango diote osteguneko (hilak 8) pala txapelketa mistoarekin. Bikoteek izena emateko azken eguna dute gaurkoa, eta hartarako bi baldintza jarri dituzte: partaideak hamasei urtetik gorakoak izatea eta emakume eta gizon banak osatzea taldea.
Bikote bakoitzak euren pala eta pilota berezkoak eraman beharko dituzte, eta 16:00etan hasiko da lehia, Biteri plazako frontoian. Oraindik izena eman dezakete interesdunek Instagram bidez edota Kamio, Mimos eta Ibaiondo tabernetako zerrendetan inskribatuz.
