Etorkizuna Eraikiz Kapsula, Errenterian izango da gaur egun osoz
2040. urtean nolako Gipuzkoa nahi duten eta norbanakoak zein konpromiso hartzeko prest dauden jakin nahi du Gipuzkoako Foru Aldundiak
Eider Mendoza Gobernantza diputatua eta Itziar Ostolaza zinegotzia. 2040. urtean nolako Gipuzkoa nahi duten eta norbanakoak zein konpromiso hartzeko prest dauden jakin nahi du Gipuzkoako Foru Aldundiak. 20 urte barruko Gipuzkoa instituzioen eta herritarren ekarpenekin osatu nahi du aldundiak, etorkizuna partaidetzan eraiki. Hala azaldu du Eider Mendoza Gobernantzako Foru Diputatuak Foru Plazan instalatu duten Etorkizuna Eraikiz Kapsulan. Iztiar Ostolaza zinegotziarekin batera egin du agerraldia gaur goizean. Mendozak berak azaldu ditu iniziatibaren helburuak, “Gipuzkoako Foru Aldundiak bultzatzen duen Etorkizuna Eraikiz programak herritarrak liurraldearen etorkizunari buruz hausnartu eta konprometitzera bultzatu nahi ditu”.
Gipizkoaren etorkizuneko erronkei erantzuteko lanean ari dela programaren bidez aldundia nabarmendu du Mendozak, “eta ariketa horretan funtsezko elementua da elkarlaneko gobernantzaren alde egitea. Zertan ari garen bezain garrantzitsua da nola ari garen, guztion artean adostutako erantzunak izan behar dute gure geroa diseinatuko dutenak, eta beraz, prozesu horretan asko dute esateko herritarrek”. Kapsularen xedea, azken hori, parte hartzea sustatzea.
Egun guztian izango da kapsula Errenteria-Oreretan; Gipuzkoan barrena bira egiten ari dira eskualde buruetan, hasiera batean, baina zabaltzeko aukera ez du baztertu diputatuak herritarren erantzunaren arabera. Tunel moduko bat da kapsula, eta Gipuzkoak dituen ezaugarriak daude bilduta bertara. Horien artetik, 2040an Gipuzkoak zein balio mantendu beharko lituzkeen galdetzen zaio bisitariari, “Gipuzkoarrek zeri ematen dioten garrantzia jakiteko baliatuko dugu”.
Lehen urratsa eginda programaren gaineko xehetasunak ematen ditu labur, eta ibilbide bukatzeko, etorkizuna eraikitzeko konpromiso bat idazteko eskatzen zaio bisitariari. Hori inprimatu eta etxera eramateko aukera du bisitari bakoitzak, kapsula txiki batean gordeta. Eramango duen txartela hori, gainera, hazia da, biokonpostagarria eta lore bat emango du landatuz gero, “horrekin herritarren konpromisoak fruitua duela adierazi nahi dugu”.
Kapsularen kanpoaldean photocalla dago, herritarrei euren konpromisoarekin argazkia ateratzera gonbidatuz. Argazki horiek herritarrei bidaliko dizkiete posta elektroniko helbidea ematen badute.
Arrasate, Irun, Beasain, Eibar eta Zarautzen izan da kapsula eta gaur Errenteria-Oreretako egonaldia amaituta, Tolosara bidea hartuko du bihar. Eguneko 150 ekarpen inguru jasotzen ari direla bisitatutako herrietan esan du Mendozak, eta kopuru esanguratsua dela erantsi. Ideia bat nabarmendu du azkenik, “kontzientzia sortu nahi dugu gure etorkizuna eraikitzearen alde lan egiteak duen garrantziaren gainean”.
