Ez diete pentsioak negozio bihurtzen utziko
Gai bat erdigunean atera dira pentsiodun eta jubilatuak kalera gaurko elkarretaratzea eta manifestazioan; Gizarte Segurantzari berehalako auditoria egiteko eskaera pentsio publikoen defentsan.
Duintasunaren protesta gaur goizean. Kalean izan dira, enegarrenez, pentsiodun eta jubilatuak. Oraina dute jokoan, baita etorkizuna ere, beraiena bakarrik ez, pentsioen auzia, belaunaldi gazteei ere eragingo dien kontua delako. Eskaerak, betikoak, pentsio nahikoak bermatzea bizi ahal izateko duin, emakume eta gizonen arteko pentsio arrakalarekin amaitzea, pentsio sistema publiko propioa… eta gai bat erdigunean gaurko elkarretaratzea eta manifestazioan, Gizarte Segurantzari auditoria egiteko eskaera pentsio publikoen defentsan.
Datu bat diru nahikorik ez dagoela esaten dutenentzat eta Duintasunak gaurko protestan zabaldu duena: 1989. eta 2013. urteen artean 155.500 milioi euro esbideratu ziren gizarte kotizazioetatik osasun eta ordainsaririk ez duten osagarriak ordaintzeko: “Iruzur horrek gizarte segurantzako erreserba funtsari, hau da, pentsioen itsulapikoari eragin zion; izan ere, 2000 eta 2011. urteen artean 68.000 milioi euro baino ez zituen bildu, eta hurrengo zortzi urteetan heldutako gobernuek ia hutsik utzi zuten”. Kontuen auzitegiak gizarte segurantzaren kontuen fiskalizazio txostenetik hartutakoak dira datu horiek.
Gogor salatu du Duintasunak erabaki hori, “bizitza oso baten ondoren pentsio duin bat bermatzeko baliabideetan eskua sartzeko eskrupulorik ez baitute izan. Pentsioen Sistema Publikoa erasotzeko erabili zuten kotizazioen desbideratzea, erretiro adina atzeratuta, pentsioak jaitsita, kalkulua egiteko urteak gehituta, eta iraunkortasun faktorea sortuta urte gehien bizi direnak zigortzeko. Sistema publiko okertu zuten, diru publikoarekin sustatutako eta bankuek kudeatutako pentsio funts pribatuetan aurreztu behar genuela konbentzitzeko”.
Erantzun argi eman dute pentsiodun eta jubilatuek, “orain arte ez badute ziria sartzea lortu, orain ere ez dute lortuko. Ez dute lortuko langileok geure teilatura harriak botatzea lan akordioen bidez pentsio sistema osagarriak ezarriz. Ez diegu pentsioak negozioa bihurtzen utziko, ezta osasuna, hezkuntza, mendekotasuna, etxebizitza eta pertsonentzako edozein behar ere negozio egitea onartuko”.
Eskaera gaurkoan, auditoria egitea, publikoa, eta berehalakoa 2023ra arte itxoin gabe, pentsioen itsulapikoan sartu ez ziren kotizazio sozialen superabitak non dauden jakiteko.
Gaurkoan ere, konpromiso irmoa: kalean jarraituko dute, borrokan, “desberdintasunari eta bidegabekeriari buelta eman arte eta gure aldarrikapenak lortu arte”.
