Arraun asteburua: ETE Ligako bi estropada eta bana KAE1 nahiz KAE2-n
Larunbat nahiz igandean lehian izan dira San Juango 'Batelerak'. Gizonen artean, 'Libia', 'Azkuene' eta 'Erreka' ontziek estropada bana izan dute.
'Erreka' eta 'Libia' ontziak Camargoko estropadan, Larunbatean. Argazkia: Josu Z. 
Zortzi bandera izan dira jokoan joan den asteburuan, eta haietako lautan Pasaiak ordezkaritza izan du. Larunbatean Camargon (Kantabria) eta Donostian izan ziren ETE, KAE1 eta KAE2 mailetako ontziak, eta igandean saioa errepikatu zuten emakumeek, Lekeition.
ETE Ligako seigarren estropada Donostirarra bandera lortzeko lehiatu zuen San Juanen Batelerak ontziak. Emakume arrosek bosgarren postua lortu zuten orduan, eta hurrengo goizean Uribarren Abaroa Banderagatik berriro eman zuten aurpegia, seigarren geldituz. Gauzak horrela, bosgarren da San Juan-Koxtapeko emakumeen ontzia ETE-ko sailkapen orokorrean.
KAE1-en, Pasaiako ordezkari izan ziren San Pedro eta San Juango ontziak larunbatean, Camargoko Udala banderagatik. Arrosak bosgarren gelditu ziren, eta zazpigarren moreak. Ligako sailkapen orokorra hemen dago ikusgai; Libiako arraunlariak laugarren dira gaur-gaurkoz, eta horiei jarraiki, bosgarren da Erreka ontzia.
Gizonen arrauneko bigarren taldean, Pasaiako ordezkaritza Trintxerpe-Illunbek aurkeztu zuen Azkuene ontziarekin larunbatean Donostian, Kaiarriba banderagatik. KAE2 Ligako laugarren estropada izan zen hura eta pasaitarrak azken izan ziren. Sailkapen orokorra hemen ikus daiteke.
