Donibaneko saneamenduari ekiteko prozesua irailean hasiko da
Lehen fasean aurreproiektua jendaurrean jarriko dute, informazio eta partaidetza prozesuari ekinez. Lanak noiz hasiko diren ez dute iragarri.
Jose Ignacio Asensio eta Izaskun Gomez, udaletxean, gaur goizeko aurkezpenean. 
Gaur goizean eman dute Pasaiako udaletxean hamarkada luze “enkistaturik” daraman arazoaren soluzioa izan litekeenaren berri. Donibaneko saneamenduaren informazio eta partaidetza prozesuari irailean ekingo zaio.
Jose Ignacio Asensio Ingurumeneko eta Obra Hidraulikoetako diputatuak eta Izaskun Gomez alkateak eman dute akordioaren berri. Aurreproiektuarekin bat egin dute, aldundi eta udalaz gain, baita URA eta Añarbeko Ura enpresek ere, zuzeneko lotura izango baitute etorkizuneko lanekin.
Ingurumen eta Obra Hidraulikoetako Departamentuko teknikariek Pasaiako barrutiaren saneamendurako aurreproiektu bat garatu dute. Lanen detaile teknikoak jasotzen dituen dokumentu hori jendaurrean jarriko dute, informazioa publiko egin eta proposamena parte hartze prozesupean jarriz.
Lehen fasea: parte hartze prozesua
Lehen fase horri irailean ekingo zaio, eta sanjuandarrek parte har dezatela bereziki garrantzizkoa dela errepikatu du alkateak, horiek izango baitira lanek eragingo dituzten afekzioen zuzeneko kaltetuak. Parte hartze prozesuan, bizilagunek nahi dituzten proposamen eta eskaerak egin ahalko dituzte, eta horiek proiektuan barne hartzea baloratuko da gero.
Ekarpen eta iradokizunak aurkezteko hilabeteko epea ezarriko dute aurreproiektua jendaurrean jartzen denetik. Denbora hori igarotakoan, txosten bat garatu asmo dute ondorioak bizilagunei bidali eta bildutakoa jendaurreko informazio saio batean azaltzeko.
Lanen nondik-norakoak
Obrei buruzko detailerik ez dute aurreratu oraindik. Litekeena da Donibane kaleko lurzorua guztiz altxatu behar izatea uraren saneamendu sistema guztizkoa ezarri ahal izateko; dena den, diputatuak jakinarazi du lan horiek zatika eta fase ezberdinetan egingo liratekeela, kontuan izanda barrutiak kale bakarra dela.
Asensiok ez du xehetasun handirik eman nahi izan, baina aurreratu du obrek barne hartzen dutela ponpaketa-sistema bat ezartzea, ur motak (jatorriaren arabera) bereiziko direla eta litekeena dela hainbat etxebizitzen fatxadei zuzenean eragitea esku-hartzeek. Horretarako soluzioa bizilagunekin adostu beharko dute.
