Oarsopediaren bidez, komunitateari ekarpena egiteko asmoa dute
Oarsopedia Herritar Taldearekin bat egin dute sanjuandar eta lezoarrek.
Donibaneko argazki zaharra. Pabak, txalupak lotzeko erabilitako egurrezko makilak, eta motora batetik sarea ateratzen.
Antxon Basurko
Sanjuandarren Oroimena Taldeko kidea da Nerea Ibañez Etxeburua. Hiru urte daramatza taldeak lanean herriko argazki zaharrak eta adinekoen ahozko testigantzak jasotzen. Ubera liburutegi berrituaren bueltan sortu zen taldea. «Filosofia aldatu eta komunitatea lerro estrategiko gisa ezarri zen. Liburutegiko arduraduna, gainera, hainbat dinamika berri martxan jartzen hasi zen parte hartzea sustatzeko». Herrian adineko bizilagun asko daudela esan du Ibañezek: «Hiltzen den bakoitzeko, liburutegi bat erretzen da. Ezagutza hori galdu baino lehen, haien testigantzak jasotzea erabaki eta lanean hasi zen taldea».
Grabatutako elkarrizketa horientzako plataforma egokia badute. Ahotsak proiektuaren barruan txoko bat sortu dute web orrian Sanjuandarren Oroimena izenarekin, eta bertara eramaten dituzte egindako guztiak.
Garai bateko argazki zaharrekin gauza bera egitea erabaki zuten, bildu eta zabaltzea, ondare hori herritar guztiekin partekatzeko. Zailagoa egin zaie hori, ordea. Ehunka eta ehunka argazki dituzte bilduta, baina horietako askoren egilerik ez dute ezagutzen, eta ezin izan dituzte webgunera igo. «Oarsopedia Herritar Taldea abiatuko zutela ikusi genuenean, ateak zabaldu zitzaizkigun. Izan ere, Wikipedia plataforma egokia da argazki horiek sareratzeko eta biltzen ari garen hainbeste informazio zabaltzeko». Uste du Wikipediara edukiak igota komunitateari ekarpena egingo diotela, eta argi du taldeko kideek jarraituko dutela Oarsopedia lantaldean, «bai hurrengo bi saioetan, baita datorren ikasturtean modu iraunkorrean ere».
Nerea Ibañez Etxeburua Sanjuandarren Oroimena taldeko kidea
«Gure helburua ez da pilatzea, biltzen
ari garen guztia herriari itzultzea baizik»
Nerea Ibañez Etxeburua, Sanjuandarren Oroimena taldeko kidea
Bide batez, sanjuandarrak bat egitera animatu ditu: «Belaunaldi berriekin ondare hau guztia konpartitzeko, helburua ez delako pilatzea, biltzen ari garen guztia herriari itzultzea baizik».
Lezoarrak ere taldekide
Unai Tolosa Pontesta lezoarrak ere bat egin du taldearekin, eta horretan jarraitzeko asmoa azaldu du. «Lezoar gehiago animatzen saiatuko naiz, herriari ekarpena egiteko modu egokia iruditzen zaidalako lanketa hau». Lezoren gainean hamaika liburu, ikerketa eta lan, baita argazkiak ere daudela esan du lezoarrak, eta horiei guztiei Wikipedian lekua ematea herritarrentzat aberasgarria izango den zalantzarik ez du, «lan hori guztia, ezagutza handi hori herritarren eskura jartzea garrantzitsua litzateke».
«Lezok bere lekua izan behar du
Unai Tolosa Pontesta
jakintza eta ezagutza partekatzea da gakoa»
Unai Tolosa Pontesta, Oarsopedia taldeko partaidea
Wikipedia aurrera begirako proiektu bat den zalantzarik ez du Tolosak: «Mundukoa da, eta hor, Lezok, bere lekua izan behar du, bertan egin diren lanen lekukotza jaso behar du. Jakintza eta ezagutza partekatzea da gakoa».
Sanjuandarrek eta lezoarrek egin dute bat taldearekin, orain Pasaiako gainontzeko barrutietako herritarrak eta oiartzuarrak animatzea falta da, Errenteria-Oreretatik abiatutako proiektua bada ere, Oarsoaldea bere osotasunean hartu nahi duelako, euskarazko Wikipedian lekua emateko.
