Madalenak txuri beltzetik koloretara, erakusketa batean
1966 eta 1995 urteen artean egindako txuri beltzeko 22 argazki bildu dituzte erakusketara, Madalen Jaietako jarduera eta leku aipagarrienak erakusteko, eta beste hainbeste kartel.
Madalenetako argazki zahar bat. Ez dira aurten ere madalenak ospatuko. Horren ordez, egitaraua ondu dute jai batzordea osatzen duten eragileek, betiere osasun eta segurtasun neurriak bermatuta. Egitarau horren barruan, erakusketa berezia prestatu dute Madalenak izenburupean, eta txuri beltzeko argazkietatik koloretako karteletara bidea egingo du ikusleak. Ez du ordutegirik izango, hau da, etengabea izango da, kale erakusketa delako eta Zumardian kokatuko dute. Erakusketaren atzean, berriz, Yo he bailado eta jai batzordea daude.
1966 eta 1995 urteen artean egindako txuri beltzeko 22 argazki bildu dituzte erakusketara, Madalen Jaietako jarduera eta leku aipagarrienak erakusteko. Beste hainbeste kartelek jarriko diote kolorea erakusketari; horiek azken urteetako kartel lehiaketako irabazleen ilustrazioak dira.
Datorren asteartean, hilaren 20an zabalduko dute erakusketa eta 25era arte ikusteko aukera izango da. Madalenetako une esanguratsuenak, argazki bidez bada ere bizitzeko aukera eskainiko du, tartean txupinazoa, edota Xanti eta Maddalen erraldoiak.
Iaz ondutako egitarau guztia online izan zen; aurten, pandemiak eragina izango du, baina hainbat ekintza fisikoki egiteko aukera baliatuko du jai batzordeak, eta honakoa da bat.
