Hamabosgarren greba eguna bete dute etxez etxeko zerbitzuko langileek
Hitzarmenaren eguneraketa eta lan baldintza duinak exijitzen ari dira etxez etxeko zerbitzuko langileen grebaren bidez.
Etxez Etxeko langileek hamabosgarren eguna bete dute greban gaur. Lan hitzarmenaren eguneraketa eta lan baldintza duinak. Horiek dira etxez etxeko zerbitzuko Errenteria-Oreretako langileek eskatzen ari direna, eta hori erdiesteko greba egiten ari dira. Kalean dira egunero pankartarekin eta zarata egiten euren eskaera lau haizetara zabaltzeko. Zilegi den eskaera: baldintza duinekin lan egitea.
Gaurkoa, hamabosgarren greba eguna dute langileek. Sektore hori feminizatua da, eta feminizatutako sektore guztietan gertatzen den bezala, honetan ere baldintzak okerragoak dira. Oinarrizko zerbitzua da, zaintza da, ezinbestekoa, baina hala ere, oraindik orain, bigarren mailako gisa tratatzen dituzte ezinbesteko diren langile horiek, eta haien egitekoa. Horrekin amaitzea eskatzen ari dira, zehazki, dagokiena aitortzea, ez gehiago.
Greban parte hartzen ari diren emakumeak zailtasunak dituzte nahiko luketen moduko greba egiteko ELAko Jon Urkolak azaldu duenez, “etxez etxeko zerbitzua, oinarrizko zerbitzua da eta beraz ezin da eten. Ahal duten bezala ari dira erantzuten eta grebarekin bat egiten”. Beste ezaugarri bati erreparatu dio Urkolak, emakume horiek erakusten ari diren indarra eta konpromisoa, “beraien eskubideen alde. Indartsu daude oso, eta konbentzituta lortu behar dutela euren eskaera, zilegi delako, dagokielako. Hitzarmenaren eguneraketa eta lan baldintza duinak lortu arte, beraz, borrokan jarrituko dute”.
Negoziazio prozesuan hiru oin: Udala, enpresa eta langileak. Udalaren jarrera “egokia” izaten ari dela nabarmendu du ELAko ordezkariak, “ondo portatzen ari da udala, egoki ari da eta dirua jartzeko prestutasuna azaldu du”. Bestaldean, enpresa, “ez du konpromisorik hartu nahi”. Hirugarren oina, oinarrizko zerbitzua bermatzeko ezinbestekoak diren langileak dira; horiek argi dute, borrokan segiko dute euren eskaerak erdietsi arte.
Une honetan etxez etxeko zerbitzuan ari diren 60 langile dira Errenteria-Oreretan.
