Altzaten hondakin toxikoak daudela salatu du Altzate Bizirik plataformak
Protesta ekintza egin dute Urumea Berri enpresaren egoitzaren aurrean eta udaltzaingoak bi kide identifikatu ditu bertan.
Altzate Bizirik plataforma agerraldia egiten gaur eguerdian. Agerraldia egin du Altzate Bizirik plataformak gaur eguerdian Foru Plazan. Bertan du, Altzaten eraikiko duen enpresak, Urumea Berrik, bulegoa zabalik eta protesta ekintza ere egin dute bulegoaren aurrean. Buzo zuriak eta kutsaduraren aurkako maskarak soinean egin dute agerraldia. Salatu egin dute aurreko astean Altzateko lurzoruaren tratamendurako azterketa xehatua egiten hasi zirela : “Askotan galdetu izan dugu nola eraiki daitekeen hain kutsatuta dagoen lur eremu horretan”. Galdera horri Errenteriako Udalak “hitz politekin” erantzun ziola nabarmendu dute bildutakoek: “Eremua egoera onean zegoela eta deskontaminazioko lanak eginak zirela. Plataforman bagenekien ez zela horrela. Deskontaminazioari buruzko txostena EHUko irakasle batek aztertu zuen eta lanak ez zirela behar bezala egin ondorioztatu zuen”.
Alktzate eremutik ateratalko kutsaduarren arrastoak eraman dituzte agerraldira.
Pasa den ostiralean sartu ziren makinak laginak hartzera, eta langileek, beharrezkoa duten baimenik gabe “berriz ere” egin zutela salatu dute plataformako kideek: ” Ziur gaude lehen zundaketa gune horretan lau metro eta erdiko sakoneraino hondakin toxikoak daudela, zerion gasolio usainak hala adierazten baitzuen. Ikerketa independente batek Altzateko ekimen espekulatzaile hau bertan behera uzteko balioko lukeela pentsatu dugu, baina errealitatea berriro ezkutatuko ote duten beldur gero, herri osoaren kalterako”. Baimena bakarrik eremu batean aritzeko dutela makinek azaldu dute bildutakoek, “baina eremu osoan ari dira zundaketak eta lur mugimenduak egiten”.
Larritzat jo dute udalek, aldundiak eta Eusko Jaurlaritzak duten jarrera. “Arduragabekeriaz jokatzen ari dira, eraikitzeko baimena ematekotan baitaude, pertsonen osasunerako arriskutsua dela kontuan hartu gabe. Lezoko eta Errenteriako udalek hainbat porrot jasan ondoren, lukurreriazko bi bankuren eskutan geratuz gauzatu gabe egon zen proiektu hau bertan behera uzteko eta herritar guztientzat eremu hau berreskuratzeko aukera dute, badia eta itsasoa musukatzen dituen bazter honetaz gozatu nahi duten pertsonen aisialdirako”.
Lezo eta Errenteriako udalei lanak gertutik begiratzeko eskatu diete, eta baimenik gabeko lanak baldin badaude eteteko.
Udaltzaingoak bi kide identifikatu ditu.
Agerraldia egiten ari ziren bitartean, usain txarreko likidoa isuri dute Urumea Berri enpresak duen bulegoaren sarreran, eta Altzaten ez eraikitzeko zioen kartela itsatsi dute atean. Bulegoan ari zen langileak deituta, berehala bertaratu dira udaltzainak eta Ertzaintzaren lau auto. Plataformako bi kide identifikatu dituzte.
