Lezoko Kulturako aplikazioa berritu dute
Modu erakargarriago eta ikusgarriagoan antolatu dituzte aplikazioko edukiak. Bestelako zerbitzuen jabe egin daitezke aldi berean herritarrak.
Lezoko Kultura Saileko aplikazioa berritu dute. Asmoa da udalerriko kultur emariaren berri era erakargarriago eta ikusgarriagoan izatea gailu eramangarrien bidez (sakelako telefonoak eta tabletak). Hala, besteren artean, argazkiek garrantzi handiagoa hartu dute, mezuen argitasuna areagotuz. Kultura Sailak aurreratu du berritu diren atalez gain, beste batzuk hobetzeko lanean ari direla.
Aplikazioa doan deskarga daiteke Android eta iOs teknologia erabiltzen duten gailuetako denda birtualetatik.
Kulturako gaiez gain, udalarekin harremana duten beste hainbaten berri izan daiteke aplikazioaren bitartez. Gainera, sarreren salmentarako zerbitzuak ere badu tartea, eta aldi berean, kiroldegirako online hitzorduak ere har daitezke.
