Udaltzaingoa: "Kalean egote hutsa ez da kausa izango isunik jartzeko"
Ordutegiaren murrizketa berriak kale edanean sortu izan diren pilaketak ekiditea du helburu; gaueko zaingoa indartuko dute hori bermatzeko.
Pasaiako udaltzainak, Antxon. Artxibo irudia. 
Pasaiako Udaltzaingoak aditzera eman du indarrean sartu berri den neurri murriztaile berria arautzeko irizpide nagusia “zentzua eta zuhurtzia” izango direla, zalantza eta kontraesan asko sor baititzake. Izan ere, gauerditik goizaldeko 06:00ak arte kalean ez biltzekoa gomendioa baita, eta, nagusiki, azken aldian kale edanaren ondorioz sortu izan diren jende pilaketak etetea du helburu.
Polizia munizipalak jakinarazi du “kalean egote hutsa” ez dela kausa izango inori isunik jartzeko; bai, ordea, bizikide ez direnen artean derrigorrezko distantzia ez bermatu eta, bereziki, alkoholdun edariak eremu publikoan kontsumitzea. Arau hori ez da berria, aurretik ere legeak espresuki debekatzen baitzuen kale zurrutean aritzea; dena dela, halako bilkurak errotik atera asmo dituzte.
“Badakigu Pasaiako zein lekutan bildu ohi den jendea, eta eremu horietan gaueko zaingoa indartuko dugu, ditugun baliabideekin”, aitortu dute. Ertzaintzarekin elkarlanean arituko dira hartarako.
Terrazak
Pasaiako poliziak zuhurtzia eta arduraz jokatzea galdegin du, eta murriztapen berriarekin hala jarduten ahaleginduko direla haiek ere ziurtatu dute. Ezbaiak egonen direla jakin badakite aurretik, esate baterako, tabernen araudia hartu dute ahotan; ostalaritza establezimenduek terraza zabalik eduki dezakete 00:00etatik aurrera ere, eta bertako kontsumitzaileek mahaitik jaiki ondoren egungo egoerarekin arduratsu jokatzen badute, “ez gara gu beraien atzetik ibiliko halakoetan inori isuna jartzeko”.
