Kantuan bukatuko dute ikasturtea Lau Haizetaran
Igandeko bertso saioaz gain, astearterako beste ekitaldi bat antolatu du Lau Haizetarak Ilargi abeslariarekin eta Xenpelar Bertso Eskolakoekin.
Ikasturtea bukatzeko abestea baino ezer hoberik ez. Hori erabaki du Lau Haizetara Euskaltzaleon Topaguneak. Hala, biharko (igandea) Hau Bizipoza! kultur egitasmoaren barruan antolatutako bertso saiaz gain, hilaren 20rako (asteartea) kantaldia eta musikatutako bertsoen saioa antolatu dituzte: 19:00etan hasiko da, elkartearen egoitzaren aurreko plazan.
Kantaldia Ilargi Arrizabalaga bakarlari lezoarrak emango du. Musikatutako bertsoak, ordea, Xenpelar Bertso Eskolakoek egin dituzte, Iker Gomezek musikatuta. Ekitaldia irekia da, baina Lau Haizetarak dei berezia egin die bazkideei zein ikasturtean zehar era batera edo bestera ekarpena egin dutenei ager daitezen. Osasun segurtasun neurriak egongo dira.
Ikasturtean egindakoetara begira jarrita, Aukerak sortzen prozesua gauzatu dutelako harro azaldu dira elkartekideak. Gainera, landu dituzten egitasmo gehientsuenak egiteko aukera izan dutela nabarmendu dute. “Abuztuan atsedena hartuko dugu. Hala ere, jarduera gelditu aurretik, gonbidatu nahi zaitugu elkarteak antolatu dituen bi ekitaldietara”.
