Udan, abenturak Listorretan
Errenteria-Oreretako Aiako Harrian dagoen naturguneaz gozatzeko aukera izango dute herritarrek hainbat jardueraren bitartez.
Naturaz eta herriko ondareaz gozatzeko tartea nahi dutenek, badute aukera. Listorretan udarako hainbat ekitaldi eta jarduera antolatu dituzte. Udako abenturak dira. Listorretako aisia gunea ezagutaraztea da saio horien asmoa. Gipuzkoako Parketxe Sareak eta Errenteriako Udalak elkarlanean antolatu dituzte horiek. Denetan, COVID-19aren gaineko prebentzio neurriak hartuko dira.
Hilaren 23an (ostirala), ilunabarreko 21:00etan Igeldoko Arrano Etxean sendatutako zapelatz bat eta urubi bat askatuko dituzte, Gipuzkoako basozainen eskutik. Hegazti horien gaineko azalpen interesgarriak eta argazki ederrak ateratzeko aukera egongo da. Euskarazko jarduera da.
Hurrengo egunean, hilaren 24an, 10:30ean Baso bainua jarduera egingo dute. Amaia Agote adituak, Japonian sortutako Shnrin-Yoku saioa egingo du: herritarren estresa murrizteko jarduera da, naturarekin bat egiteko aukera emanez parte hartzaileei hainbat erlaxazio teknikaren bitartez. Elebitan da, eta abuztuaren 7an egingo dute beste saio bat.
Hilaren 30ean, berriz, saguzarren mundua ezagutzeko irteera egingo dute, 21:00etan hasita, eta Ane Caro adituaren eskutik. Animalia horiek inguruan duten garrantzi ekologikoaz mintzatuko da, besteak beste, aditua. Euskaraz eta gaztelaniaz da saioa.
Abuztuaren 4an, azkenik, Iparra galdu gabe familientzako jolasa prest dute hala nahi dutenek. Orientazio jolasa da, pisten bitartez egiten dena.
Jarduera guztietan nahitaez eman behar da aldez aurretik izena. Horrela:
- 943 49 50 60 edo 688 89 50 58 telefono zenbakietara deituz.
- Posta elektronikoz.
