Zumaiako bandera irabaztetik 36 ehunekora gelditu da San Pedro
Ziaboga guztietan 2-3 segundo atzetik izan dute Getaria atzean moreek, baina azken luzean erabaki da estropada. San Juan bosgarren izan da.
Argazkia: Sanpedrotarra Arraun Elkartea Ia-ia, baina ezin. San Pedro KAE1 Ligako aurtengo bigarren bandera lortzekotan izan da, baina ezin azkenean: 36 ehunekok, arnasaldi txiki batek, Getariaren aldeko ufada eman dute. Pena.
Zumaiako XXXVI. Ikurrina izan dute jokoan gaur eguerdian Pasaiako gizonen bi traineru nagusiek, San Pedrok eta San Juanek, KAE1 Ligako zazpigarrena. Libia azken txandan, ohorezkoan, atera da Pedreña, Kaiku eta Getariarekin batera. Egin dituzten hiru ziabogatan, denetan, aurretik izan da San Pedro Getariari 2-3 segundoko aldea aterata. Baina azken luzean getariarrek estutu, eta arnasaldi txiki horregatik zakura eraman dute trapua.
San Juanek, berriz, sasoian darabilen erregulartasuna mantendu du. Bigarren txandan atera da Erreka Zumaiarekin, Orio Brekin eta Arkoterekin batera. Bigarren izan dira txandan arrosak Arkoteren atzetik, baina ohorezko txandako Kaikuk denbora txarragoa egin duenez, gaurko sailkapen nagusian bosgarren izan dira Endika Zalduak entrenatutakoak.
Gauzak horrela, KAE1eko sailkapen nagusian bigarren postura igo da San Pedro 10,57 puntuko batez bestekoarekin Getaria liderraren koefizientea 11,29koa da. Erreka ontziak, berriz, bosgarren jarraitzen du 9,14 puntuko batez besteko puntuazioarekin. SARTU HONA KATEGORIAKO EMAITZAK ETA SAILKAPENAK IKUSTEKO.
Bihar asteburuko bigarren estropada dute KAE1ekoek, Orion (11:30).
