Atxilotu bat Errenteria-Oreretan, lapurreta egin nahi izatea egotzita
30 urteko gizona da atxilotu dutena, eta lapurretagatik polizia aurrekariak ditu. Gaur eramango dute epailearen aurrean deklaratzera.
Eusko Jaurlaritzako Segurtasun Sailak jakinarazi du goizaldean 30 urteko gizon bat atxilotu dutela, Errenteria-Oreretako Iztieta auzoko saltoki batean lapurreta saiakera egiten ari zela.
Kalez jantzitako ertzainek entzun dute dendaren alarma joka ari zela, eta hara hurbildu direnean ikusi dute establezimenduaren metalezko itxitura behartuta zabalik zegoela, eta aireztapen sistemaren zati bat hautsita zegoela. Aldi berean, barrualdean gizon bat zegoela ohartu dira. Goizaldeko 01:15ak aldera izan da hori.
Ertzainek kanpora ateratzeko esan diote lapurreta egin ari zenari. Irteterakoan atxiki, eta lokala ikuskatzen hasi dira. Poliziek, atariko kalteez gain, beste hainbat ikusi dituzte: erakusketan zegoen objekturen bat hautsita zegoen, eta kutxa erregistratzailea zabalik eta lurrean botata zegoen.
Horren aurrean, gizona atxilotzeko arrazoiak zeudela ikusi eta Ertzain Etxera eraman dute, indarrez lapurreta egitea egotzita. Segurtasun Sailak zehaztu du atxilotutakoak polizia aurrekariak dituela antzeko delituengatik. Gaur eramango dute epailearen aurrera.
