Torrekuak hartuko du behin-behinean Badalab, euskara biziberritzeko iniziatiba
Datozen hilabeteetan abiatuko dute Badalab Errenteria-Oreretako Torrekua eraikinean. Euskal Herriko mugetatik harago erreferentzia bilakatzeko bokazioa garatuko du hasieratik, aitzindaria baita nazioartean.
Badalab euskara biziberritzeko iniziatibak lehen urratsak egin ditu. Argazkia: Herri Bizia Euskara biziberritu eta hiztunen arteko berdintasuna sustatzeko esperimentazio gune erreferentziala izateko helburuz sortu dute Badalab Hizkuntza eta Gizarte Berrikuntzarako Laborategia. Hizkuntza gutxituak biziberritzeko lanean diharduten guztientzat, erreferentzia izango da Badalab, eta behin-behinean, Torrekua eraikinean izango du egoitza.
Atzo finkatu zituzten laborategia martxan jartzeko bi erabaki nagusiak: iniziatiba babesten duten entitate publiko eta sozialak osatu duten partzuergoaren eraketa, eta iniziatiba gidatuko duen gobernu batzordearen osaketa.
Proiektuaren bidez, berrikuntza eta esperimentazioa euskararen biziberritzean txertatu nahi dute, eta aldi berean, hizkuntza, gizarte berrikuntza prozesuetan kokatzea. Euskararentzat aukera berriak identifikatu eta horietan eragiten saiatuko da, prototipo berriak proposatuta, eta hizkuntza teknologiarekin ere esperimentatuko du.
Oinarriak horiek, eta hortik abiatuta hiru emaitza nagusi lortu nahi ditu BAdalabek: euskara indartuko duen ekosistema eraberritu eta aberatsagoa lortu eragile berriekin osatua, euskarak, etengabe sortzen diren testuinguru berrietan presentzia izan dezan eta erabilera areagotu dadin; prototipo eta proposamen ausartak gauzatzea euskaraz; eta azkenik, narratiba berriak eta euskarazko bizipen zirraragarriak sorraraztea, formatu eta testuinguru anitz eta digitaletan—aisialdian, kulturan, lan munduan, sorkuntzan…—
Duela hiru urte abiatu zuten iniziatibaren gaineko gogoeta, Gipuzkoako Foru ALdundiak, Langunek, Elhuyarrek, Emunek eta Soziolinguistika Klusterrak bestelako erakundeen eta euskalgintzako ordezkarien partaidetzarekin.
Atzoko urratsa eginda, datozen hilabeteetan abiatuko dute Badalab Errenteria-Oreretako Torrekua eraikinean. Behin-behineko egoitza izango du sorkuntzarekin estuki lotutako eraikina. Euskal Herriko mugetatik harago erreferentzia bilakatzeko bokazioa garatuko du hasieratik, aitzindaria baita nazioartean.
