[Galeria] Oiartzungo txokoak margotu dituzte Elizalden
Herri eskolako guraso taldeak antolatuta, herriko txokoren bat margotzeko hitzordua izan dute gaur ikasleek. Aurten festarik egingo ez denez, kultura eta txikien parte hartzea bultzatzea izan da helburua.
Oiartzungo txokoak margotzeko jarduera Elizalde Herri Eskolan.
Elizalde Herri Eskolan hitzordu berezi bati erantzun diote gaur goizean zehar. Ikastetxeko guraso elkarteak deituta, Oiartzungo txokoren bat paperean margotzeko dinamika finkatuta zuten, Kulturabirusaren egitarauaren barruan.
Margolanak eginda, pilotalekuan zintzilikatutako sokan erakutsi dituzte ikasle gazteen sorkuntzak.
2021. urteko xanistebanak bertan behera geratu izanaren aurrean, kultura bultzatzeko ahalegina egiten ari dira Oiartzunen. «Elizaldeko Guraso Elkartekoak hau antolatu dugu polita iruditu zitzaigulako», azaldu du Gotzone Aristizabal elkartekideak. Erantsi duenez, «ideia zen umeak Oiartzundik ateratzea eta marraztea beraiek nahi zutena, gero hemen elkartu eta denen margolanak zintzilikatzeko».
Eguraldiak gehiegi lagundu duela-eta ez du parte hartze handirik izan jarduerak. «Penatuta» agertu dira antolatzaileak, baina hala espero zutela adierazi du Aristizabalek: «Bagenekien eguraldi ona egin behar zuela, larunbata da, eta jende guztia kanpoan dago. Pena, egia esan, polita izango zelako dena [sokak] bete izana».
Hala ere, parte hartu duten ikasleek margotzen «disfrutatu» dutela onartu dute. Gainera, irudimenik ez zaiela falta agerian geratu da. Egindako marrazkien artean ikus zitekeen, besteak beste: parke bat, ur jauzi bat, Gabonetako zuhaitza eta izarra, testuren inguruko artelana, eta dinosauro bat.
Bertan jarduerak emandako hainbat argazki:
