Zirkuitu handietara jauzia egiteko prest dago 34. zenbakia
Andoni Dominguez motor gidari gazteak bukatzear du 2021eko sasoia: Gaztela Mantxako Minimotard 85 txapelketa irabazteko zorian da. 2022rako erronka handiagoak ditu esku artean, tartean, Moto5en aritzea.
Planez beteta du burua Andoni Dominguez motor gidari lezoarrak. 2022ko sasoian Moto5 izeneko txapelketan parte hartuko du. Bertan izanik, Espainiako Estatuko zirkuitu handietan lehiatzeko aukera izango du hamabi urteko kirolariak, Munduko Txapelketako lasterketak hartzen dituztenak, alegia. Burua han izanda ere, epe motzeko helburuak ere baditu. Esaterako, irabaztear da Gaztela Leongo Minimotard 85 txapelketa. 34. zenbakia darama bere motorrean gazte lezoarrak. Jada aski ezaguna da inguruko eta haragoko zirkuituetan haren gidatzeko era, baita gauzak ongi egiteko gogoa ere. Bihurgune eta zuzengune guztietan 34a denen aurretik jartzea du helburu.
Ez du urte erraza izan, ordea, lezoarrak. Bi hilabetez lesionatuta izan da Dominguez, eta horregatik, Minimotard 85eko Espainiako Txapelketan ezin izan du behar bezala parte hartu, lasterketa asko galdu dituelako. Bai, ordea, Gaztela Leongoan. Hura irabaztear da: sailkapen nagusian lehena doa, eta hilaren 10ean Segovian egin beharreko azken lasterketak txukun egiten baditu, handik garaikur nagusia ekarriko du Lezora. «Ia-ia lortuta dago. Baina beti bezala adi egon behar du Andonik, ez dadin zer edo zer arraroa gertatu», zehaztu du Goyo Dominguezek, Andoniren aitak.
2021eko sasoia bukatzear du, beraz, kirolariak. Atsedenerako tartea izango du. Baina ez dute oso aparte utziko 2022 urteko sasoia: Minimotard 85eko Espainiako Txapelketa ona egitea du helburu gidariak, baita Moto5ekoan hastea ere.
Erronka
Minimotard 85en motokros itxurakoak dira motorrak, baina koskarik gabeko gurpilekin. Mistoak izaten dira horietako zirkuituak, lurra eta asfaltoa nahasten dituztenak. Moto5en, ordea, ibilgailuek karreretako motorren itxura dute: Andonik esku artean izango duen makina 250 zentimetro kubokoa izango da, 27 zaldiko potentzia emango du, eta gehienezko abiadura orduko 180 kilometrokoa. Espainiako Estatuko erkidegoen arteko lehian ariko da, asfaltoko zirkuitu handietan.
«2022an ikastera joango gara, jada zirkuitu handietan ariko delako Andoni. Bi urte barru kategoria handiagoren batera joateko asmoa dugu. Baina lehenik, lehena: ikasi behar da. Gastu handia dute gisa horretako txapelketek, eta lehenik ikusiko dugu ea dena ondo doan, jauzia egiteko», azaldu du Goyo Dominguezek.
Motoziklismoa kirol garestia da. Eta Dominguez aitak ez du aukerarik galtzen balizko babesleei deia egiteko, lezoar gazteari laguntza eman diezaioten publizitatearen truke.
Dominguezek ez du aukerarik galdu Lezoko Udalari eskaera egiteko. Gipuzkoako hainbat pilotuk dagokien udalaren laguntza jasotzen dute motorrean lehiatzeagatik, baina Lezon ez. «Eskola Kirolan aritu behar dela esaten digute udaletik. Baina motoziklismoko Eskola Kirolik ez da hemen. Behintzat bidaiak ordaintzen laguntzeko sostengua emateko aukera balute… Izugarri onuragarri litzateke hori guretzat».
