Ariketa fisikoa egiten, gozatzen
Aste honetan hasi dituzte Lezon Tipi-Topa eta Martxan egitasmoen gaineko saioak. Orotara, 40 lagunek parte hartu dute horietan.
Martxan dira jada Lezoko Tipi-Topa eta Martxan egitasmoak. Bien helburua da ariketa fisikoarekin gozatzea, batez ere adinekoentzat bideratutako saioetan. Tipi-Toparekin herrian zehar eta kanpoan ibilaldiak egiten dituzte ostegunero (10:30ean hasita); Martxan-ekin, berriz, hainbat ariketa egiten dituzte partaideek Bekoerrotan, asteartero (10:00-11:00).
Aste honetako saioetan, esaterako, 23 izan ziren Tipi-Toparekin bat egin zutenak ostegunean. Eguraldi ona lagun, Donibane aldera joan ziren oinez. Musikarekin, saldarekin eta zizka-mizkekin bukatu zuten jarduera gustura aski Gurutze Santuaren plaza berreskuratuz.
Martxan-en saioan, berriz, hamazazpi izan ziren parte hartzaileak.
Aste honetako jardueren laguntzaileak Lezoko osasun zentroa, Lezoko Pastoraleko kideak, Aiton Borda, udaleko Gizarte Zerbitzuen eta Kirol Sailak izan dira. Jon orientatzailea izan da saioen gidaritzan. Datorren astekoetan, herriko botiketako kideak ere izango dituzte lagun.
