Elektriken gehiegikeriak salatu dituzte
Ez da elektriken gehiegikeriaren aurrean antolatutako protesta bakarra izango. Gaur bertan, beste elkarretaratze batera deitu dute.
Elektriken kontrako elkarretaratzea atzo. 2020. urtean zehar, jendartea krisi larrian murgilduta zegoen bitartean energia enpresa handiek milaka milioietako irabaziak izan zituzten. Endesak eta Iberdrolak 5.000 milioi eurotik gora irabazi zituzten, 2019arekin alderatuta, %36 gehiago. Hala ere, inoizko igoerarik handiena izan du argindarrak, eta muturreko egoeran jarri ditu horrek hamarnaka familia.
Hori salatzeko elkarretaratzea egin zuten atzo 19:00etan hasita Herriko Plazan hainbat herritarrek. Argindarraren prezioa jaitsi, eta lehen lerroan pertsonak jartzeko eskatu zuten protestaren bidez.
Gaur Iztietan
Ez da elektriken gehiegikeriaren aurrean antolatutako protesta bakarra izango. Gaur bertan, beste elkarretaratze batera deitu dute. Deialdiaren antolatzailea, Grupo Oarso Taldea da eta 19:00etan egin du hitzordua Iztieta auzoko Diputazio plazan, autobus geltokiaren inguruan, Elektrikak lapurrak goiburuarekin.
Gaurko kontzentrazio hori zaratatsua izango da, eta bihar 22:00etatik 22:30era deituta dagoen itzalaldi zaratatsuarekin bat egitera deituko dituzte herritarrak. GOTek herritar guztiak deitu ditu elektriken gehiegikeria salatzera gaurko elkarretaratzean.
