Lezoko PSE-EE: "Aurrekontuek lezoarren ongizatean eragiten jarraitzeko balioko dute"
2022ko aurrekontuak onartu direlako gustura dago Lezoko PSE-EE. Gobernu taldearen egonkortasuna bermatzen dutela adierazi du Joxean Sanchez eledunak.
Jose Angel Sanchez (PSE-EE). Lezoko PSE-EE gustura dago joan den asteko udalbatzarrean onartutako aurrekontuekin, 2022koekin alegia. “Lezoarren ongizatean eragiten jarraitzeko balioko dute”, azaldu du sozialisten eledun Joxean Sanchezek. Gizarte gaietan eta zerbitzu publikoetan egingo diren inbertsioak nabarmendu ditu, eta etorkizunera begirakoak ere baloratu ditu. Gainera, aurrekontuak onartzeak agintaldia bukatu artean “egonkortasun politikoa” ziurtatuko dutela adierazi du. 9,3 milioi euroko aurrekontua izan zen irailaren 30eko udalbatzarrean onartutakoa, 2021koa baino 500.000 euro gehiagokoa.
Udal kontuen hazkundea izanda ere, horrek lezoarren ekonomian eraginik ez duela izango adierazi du Sanchezek, zehaztu baitu zazpigarren urtez jarraian udal zerga eta tasek ez dutela igoerarik izango: “Hori horrela izatea gobernu talde honen kudeaketa serio eta arduratsuaren emaitza da”. Kudeaketa errealistatzat du haiek egiten dutena, “horregatik aurrekontuaren igoera orekatu eta iraunkorra lortu dugu”. Datu bat mean du: udalaren zorra 2022an zero eurokoa izango da. “2015etik kudeaketa bikaina egiten ari gara. Aurretik zor nabarmena zuen udalak, aurreko gobernu taldeen kudeaketa txarraren ondorioz”.
Xehetasunetan sartuz, 2022an inbertsio errealen zenbatekoa %35 hazi dela adierazi du sozialistak, 588.000 euroraino iritsiz. Horren barruan, gizarte bazterketa egoeran dauden pertsonentzat sortuko den eguneko arreta zerbitzua nabarmendu du.
Aldi berean, 2021eko aurrekontuaren soberakina 2022an baliatzeko aukera izango dela esan du PSE-EEko kideak, eta hori herriko auzoetan egin beharreko lanetara bideratuko dela zehaztu du, tartean, kiroldegian egin beharreko lanetara.
Lezoko PSE-EEk udalean dituen arduren alorrean egin beharreko batzuk aipatu ditu Sanchezek. Atal horretan, Altamirako parkea birgaitzeko lanak, lorezaintza plana egitea, edo herriko merkataritza sustatzeko plana egitea nabarmendu ditu.
