[Galeria] "Topoaren lurperatzea nahi dugu, Izaskun, baina horrela ez!"
Hamarnaka antxotar bildu ziren atzo barrutiaren etorkizunari buruz erabaki nahi dutela aldarrikatzeko. Topoa lurperatzeko baldintzak gaurko plenora eramango dituzte.
Gure Zumardian bukatu zuten atzoko mobilizazioa, bertan alkateari nahi duten etorkizunaz mintzatzeko. 
Hamarnaka antxotar bildu zituen atzo arratsaldean Luzuriaga eraikinaren kanpoaldean barrutiaren etorkizunari buruz erabakitzeko nahiak. Bertatik abiatu ziren Sos Antxo. Lurperatzea, bai, hala, ez! zioen pankarta baten atzealdean.
Antxotarrentzat nahi duten fabrika zaharretik abiatuz, topoaren soterramenduak eragingo dien zonalde garrantzitzuenetako batzuk zeharkatu zituzten: Biteri plazaren ondotik pasa ziren -bertan eraiki nahi du alkateak azoka berria, elizari itsasita-, gero, egun topoaren burdinbidea sostengatzen duen akueduktuaren azpira heltzeko.
Azken egitura horren etorkizunak hautsak harrotu ditu herritarren artean azken asteotan. Izan ere, askoren arabera, topoaren lurperatzearen abantaila nagusienetakoa beharko luke arkupe horien eraisteak, eremu horiek pasealeku bihurtuz.
Topo berriaren lanek barrutia “hankaz gora” jarriko dutela badakiten arren, obrak egitearen alde agertu ziren atzo bizilagunak, berme batzuekin, betiere. Honakoa galdegin dute:
- Ez dute azokarik nahi Biterin, San Fermin elizari itsatsita. Erabaki horrek 2009ko adostasuna puskatuko lukela argudiatu dute; are gehiago: “Non jolastuko dute Antxoko 600 haurrek? Non elkartuko gara gazteak? Zer suposatuko die guzti honek gure herriko helduei?”.
- Egungo topoaren arkupeak eraistea nahi dute; lanen abantaila nagusia dela sinetsita agertu ziren atzo.
- Luzuriaga antxotarrentzat nahi dute. “Lurperatzea bai, baina eraikina egokitzeko abagunea aprobetxatzen bada”.
Atzoko mobilizazioa Gure Zumardian bukatu zen, datozen urteetan lanengatik hesituta egongo den plazan, hain zuzen.
Bertan, biribilean elkartuta, argi hitz egin zioten antxotarrek alkateari: “Topoaren lurperatzea nahi dugu, Izaskun, baina horrela ez! Bildu zaitez behingoz antxotarrokin. Guk ere parte hartu nahi dugu gure herria eraldatuko duten erabakietan”.
Hori esanda, gaur 18:00etan udaletxean egingo duten plenora deitu zuten, orduan onartuko baitute Euskal Trenbide Sarea eta Pasaiako Udalaren arteko lankidetza hitzarmena, ordezko azoka Biterin egiteko. Arizabalo Jauregiaren aurrean errepikatuko dituzte atzoko eskaerak.
