Piraguismoak 140 gazte elkartu ditu Hospitalilloko kaian
Pasaia Kayak izan da Eskola Kiroleko zerbitzuaren arduradun. Datorren larunbatean egingo dute bigarren saioa, eta LH 5eko 150 gazte espero dituzte orduan.
Txanda bateko azken partaideak uretaratzen, aurrekoak oraindik pantalanean daudela. 
140 gazte inguru bildu ziren joan den larunbatean Trintxerpeko Hospitalillo inguruko pantalanean. Horiei piraguismo zerbitzua eskaini zieten Pasaia Kayakeko 6 arduradunek, Eskola Kirola egitasmoaren baitan.
Oarsoaldeko ikastetxe guztiei eskainitako jarduera da hori. Joan den asteburuan Orereta Ikastola, Telleri, Bizarain, Elizalde, eta Haurtzaro ikastetxeetako gazteak uretaratu ziren, eta bigarren txandan (datorren larunbatean) LH 5eko Pasaia-Lezo Lizeo, Gamon, Karmengo Ama, Egiluze, Lezo eta Koldo Mitxelenako beste 150 ikaslek izango dute piraguismoaz gozatzeko aukera.
Larunbat arratsaldean, gainera, Eskola Kiroleko bigarren piraguismo lehiaketa egingo dute Zumaian.
