Bigarren dorreoian egin behar dituzten lanengatik kezka azaldu du Eguzkik
Taldearen arabera, dorreoian begiratoki bat egin nahi dute. Horretarako hainbat lan egin behar dira Jaizkibelen: horiek ez egiteko eskatu du.
Eguzki talde ekologista eta antinuklearrak kezka azaldu du Jaizkibelgo bigarren dorreoian egitekoak diren lanekin. Taldeak jakinarazi du 220.000 euroko kostua dutela obrek, eta dorreoian begiratoki moduko plataforma bat eraiki asmo dagoela, hara iristeko eskailera batzuekin. Aldi berean, errepidetik dorreoira iristeko bidea zabalduko litzatekeela azaldu du: “Horren ondorioz, egun hegoaldeko alderako bista kentzen duten zuhaitzak moztuko dira. Litekeena da etorkizun hurbilean aparkatzeko eremua handitzea ere”.
Eguzkik oroitarazi du Jaizkibel, beraz dorreoia, Natura 2000 Sarearen barruan dagoela: “Ez dugu ulertzen nola Eusko Jaurlaritzak obra hori baimendu dezakeen hainbesteko inpaktua duenean inguruan”. Jaizkibelgo Kontserbazio Bereziko Gunean (KBE) bisiten edo begiratoki berrien erregimenik ez dela sustatu edo handitu behar uste du Eguzkik, eta Aranzadiri eskatu diote (egitasmoa idatzi du) balora ditzala lanak eta horiek eragin ditzaketen kalteak, “eta naturari errespetua badio, albora ditzala lanak”.
Gainera, lanak egingo dituzten eremua militarren tiro praktika gunean dagoela adierazi du taldeak, eta obren ondoren dorreoira bisitari gehiago joango direnez, segurtasun falta izango dela. Horrez gain, balizko bisiten gorakadak inguruan hondakin gehiago pilatzea ekar dezakeela aurreratu du: «Erakundeei eskatzen diegu uko egin diezaiotela Jaizkibel artifizialitzatzen jarraitzeari».
