Xabier Terrones idazleak 'La noche del 19' liburua aurkeztuko du
Hilaren 28an, osteguna, izango da lanaren aurkezpena, Trintxerpeko liburutegian. 19:00etan hasiko den saiora gonbidatu dituzte "herritar guztiak".
Xabier Terrones Arellano (Donostia, 1988) kazetari eta idazleak bere La noche del 19 liburua aurkeztuko du datorren asteko ostegunean (hilak 28), Trintxerpeko liburutegian.
“Misterioz betetako” obraren aurkezpen saiora gonbidatu ditu Pasaiako Udalak “herritar guztiak”. 19:00etan hasiko da. Honakoa da sinopsia:
Urtarrilaren 19a da, goizaldea, San Sebastian egun handiaren bezpera. Danborradako danbor eta upelak entzuten dira atzean, neska gazte bat ankerki bortxatu eta hiltzen duten bitartean. Urte batzuk geroago, haren arreba txikia, Miren, egiaren bila murgilduko da, Kriminologiako irakasle batek lagunduta. Protagonistak hilketa horren atzean ezkutatzen dena deskubritzen joango dira: uste baino askoz handiagoa eta sakonagoa den egia, beren bizitzak arriskuan jarriko dituena, hilketa horrek lotura estua baitu Gipuzkoako hiriburuko historia ezkutu eta ilunenarekin.
