Martxan dira Enplegu Planak
Edozein planetan sartzeko beharrezkoa da Lanbiden alta emanda izatea enplegu eskatzaile gisa,eta gazteen kasuan, baita Gazte Sistema Bermean ere.
Enplegu planen aurkezpena gaur. Argazkia: Herri Bizia Enplegu Plan Orokorra eta Gazte Enplegu Planean lanean ari da Errenteriako Udala, eta Lanbideren orrialdean kontsulta daitezke 41 lanpostuen eskaintzak, Hori, aurten garatuko den enplegu planen lehen zatia. Izaqn ere, datozen asteetan Berpiztu programaren barruan planteatuko den deialdia jarriko da abian, eta deialdi horretan bideratuko dira kontratazio pribaturako laguntzak. Azken horietan, 96 kontratazio sustatzea aurreikusten da inguruko enpresetan. Horietatik aparte, 20 kontratazio publiko gehiago egiteko aukera ere egongo da.
Enplegu Plan horiek Lanbideren diru laguntzari esker, eta Oarsoaldeko lau udalen ekarpenarekin egin ahal izango dira.
Langabeei begirako lanpostuak eskainiko dituzte planek. Langabe kopurua jaistetik harago, aipatu planek hiru helburu zehatz dituzte: Errenterian zein eskualdean enplegua sustatu; langabeei lan merkatura sartzen lagundu; eta azkenik, lan merkatuan sartzeko zailtasun bereziak dituzten pertsonen enplegagarritasuna handitzea.
Enplegu Plan Orokorra, Oarsoaldean
Plan Orokorrak 63 lanpostu eskainiko ditu Oarsoaldea osoan: 58 arlo publikoan—horietatik 31 Errenteriako Udalean, bost Oarsoaldea Garapen Agentzian, eta gainontzekoak beste udaletan— eta lau lehenengo sektorean. Hala, elektrikariak, igeltseroak, errementariak, margolariak, garbitzaileak, eta lorezainak eskatuko dituzte eskaintza horietan. Administrari laguntzaileak, dinamizatzaile bat, eta delinatzaile bat ere bada eskaintzan. Oarsoaldeko lau herrietako batean erroldatuta egotea ezinbestekoa da, eta Lanbiden altan izatea.
Kontratazioetan, gainera, hainbat kolektibo lehenetsiko dira: Diru Sarrerak Bermatzeko Errenta (DSBE) jasotzen dutenak; 45 urtetik gorako eta 35 urtetik beherako pertsonak; iraupen luzeko langabeak; gizarte bazterketa jasateko arriskuan daudenak; familia erantzukizunak dituzten emakumeak; genero indarkeriaren biktima diren emakumeak.
Kontratatutakoen %40 gutxienez, emakumeak izan beharko dute, eta %15 gutxienez 55 urtetik gorakoak. %30 DSBE jasotzen dutenak izango dira.
Akonpainamendu ekintzak dira berritasunik nagusienak aurten. Pertsona bakoitzaren enplegagarritasun diagnostikoa, enplegu teknikari baten ebaluazioa, eta zeharkako konpetentziak lantzeko 25 orduko prestakuntzak osatuko du.
Gazte Enplegu Planaren ezaugarriak
Hamar lanpostu eskainiko ditu udalak 30 urtetik beherako gazteentzako: Harreragile bat, bi administrari, digitalizatzaile bat, informatikari bat, gizarte langile bat, komunikazio alorreko langile bat, arkitekto tekniko bat, eta erdi mailako bi teknikari.
Errenterian erroldatuta egon behar dute gazteek kasu honetan, Lanbiden alta emanda, eta Gazte Bermea Sisteman ere. Hemen ere, lehentasuna izango dute DSBEren jasotzaileek.
Udalak egingo dituen kontratazioak datozen hilabeteetan gauzatuko dituzte, azaroaren bukaeratik abenduaren 31 bitartean hasi beharko lirateke, hautaketa prozesuak, beraz, datozen asteetan egingo dituzte. Lanbiden edota Gazte Bermea Sisteman alta emateko tramitazioa hasteko gomendatu die udalak horietako enplegu planen batean parte hartu nahi duten herritarrei.
OArsoaldea Garapen Agentzian, udaleko web orriko Enplegu Eskaintza Publikoaren atalean, edota Zu Zure Udala arreta zerbitzuan eskura daiteke informazioa.
