Lezoko Udalak, Iberdrolari: "Bezeroekin kontatzen ez duen funtzionamendu hau salatu nahi dugu"
Goiz-goizetik 13:30ak ingurura arte argindarrik gabe izan dira Lezoko hainbat zonaldetan. Herritarren haserrea nabaria izan da, eta udalak haiekin bat egin du.
Lezoko supermerkatu batean, langileak eta bezeroak ilunpean gaur goizean. Lezo argirik gabe esnatu da gaur. Iberdrolak egitekoak zituen hainbat lanengatik lezoar askok eta askok ez dute argindarrik izan etxean 13:30ak arte. Udalean nahiz herriko eremu batzuetan bazuten argindar mozketaren berri. Beste hainbat zonaldetako biztanleek, ordea, ez zekiten deus ere: lehenik sorpresaz harrapatu ditu elektrizitatetik ez izateak, eta ondoren haserrea gailendu da. Lezoko Udalak bat egin du herritarren haserrearekin: “Haserrea eta desadostasuna agertu nahi diogu Iberdrola enpresari, eta udalak herritarrekin bat egiten du. Bezeroekin kontatzen ez duen funtzionamendu modu hau salatu nahi dugu”.
Goiz-goizetik kezkati izan dira lezoarrak argindarrik ez zutelako etxean, gainera, askok ez zekiten mozketa izango zenik, HITZA-k goizeko lehen orduan jakinarazi duen moduan. Ehunka etxebizitza, komertzio, bulego eta bestelako ia etenik izan dira; eta martxan izan direnetan, ilunpean edo bertako gailuak geldituta. Lezo Herri Eskolan ere kalteak eragin ditu itzalaldiak, goizeko klase ordu guztietan argirik gabe izan direlako.
Lezoko Udalak azaldu duenez, udalean bai zutela argindar etetearen berri, baina nabarmendu du lezoar guztiekin ez dutela gauza berbera egin. Hau da, antza, Iberdrolak eman behar zien herritar orori mozketaren abisua.
