Dantzaz elkartea eta Oarsoaldea elkarlanean arituko dira
Dantza esparruan diharduten ekintzaileei eta enplegu bila dabiltzanei zerbitzuak zabaltzeko lankidetza hitzarmena sinatu dute.
Elkarlanean aritzeko hitzarmena sinatu du Dantzazek Oarsoaldea Garapen Agentziarekin. 
Dantzaren alorrean dihardutenei laguntzea eta dantza ekimenen sustapena babestea helburu duen Gipuzkoako Foru Aldundiaren zerbitzua da Dantzaz. Errenteria-Oreretako Niessen eraikinean kokatuta dagoen Gipuzkoako Dantzagunean du elkarteak egoitza 2014az geroztik.
Oarsoaldea Garapen Agentziak kultur elkartearekin indarrak batzea erabaki du. Agentziako presidente Miguel Angel Sanchezek adierazi duenez, Dantzazen laguntza jaso nahi duten ekintzaileei eta/edo proiektuei prestakuntza eta aholkularitza zerbitzuak eskainiko dizkiete aurrerantzean, modu koordinatuan.
Horrez gain, Dantzazen bulegoan ekintzailetza gune berri bat gaituko dutela ere iragarri dute, Kabidanz izenekoa, kultura- eta sormen-ekintzailetza bultzatzeko, Oarsoaldeak martxan duen Habian! ekintzailetza egitasmoaren baitan. Horrela, Dantzazeko proiektuak garapen agentziak duen ekintzaile eta enpresa sarearekin lotuko dituzte.
Aizpea Otaegi Errenteriako alkatea hitzarmenaren garrantziaz mintzatu da: “Kultura eta sormen sektorea bultzatzearen aldeko apustuarekin jarraitzeko aukera ematen du, gure eskualdean ekosistema hori osatzen duten eragileekin lankidetzan jarraituz”.
